Мәғлүм булыуынса, әле “Башҡортостан” гәзите “Бәйләнештә” социаль төркөмөндә “Өлгөлө атай” конкурсын ойоштора. Был сарала ҡатнашыусылар араһында Көйөргәҙе районынан Румил Ғайсин бар. Ул Ермолаевка ауылында Балалар-үҫмерҙәр спорт мәктәбендә тренер-уҡытыусы булып эшләй. Ҡатыны Лиана Илвир ҡыҙы менән өс бала тәрбиәләйҙәр. Румил Әмир улы 1989 йылда Көйөргәҙе районының Яҡуп ауылында Руфия Ғилман ҡыҙы менән Әмир Муса улы Ғайсиндар ғаиләһендә тыуған. Яҡуп ауылында IХ класты тамамлағас, Күмертау педагогия колледжына уҡырға инә. Ауылда уҡығанда уҡ көрәш менән шөғөлләнгән егет Күмертауҙа уҡығанда ла был шөғөлөн дауам итә, ярыштарҙа һәр ваҡыт беренсе урын ала, республика кимәлендә лә еңеүҙәргә өлгәшә. 2009 йылда колледжды тамамлағас, Стәрлетамаҡ физкультура институтына уҡырға инә, бер аҙҙан хәрби хеҙмәткә юллана. Армияла тәүҙә Кострома ҡалаһында, һуңынан бәләкәй сержант званиеһында Владимир ҡалаһында хеҙмәт итә. Шулай итеп, сроклы хеҙмәттә сержант званиеһында тамамлап, II дәрәжә ҡаһарманлыҡ бидәһе менән бүләкләнә. 2010 йылда тыуған еренә ҡайтҡас, институтта уҡыуын ситтән тороп дауам итә. Өс йыл самаһы Мәскәүҙә төҙөлөштә арматурасы булып эшләй. 2013 йылда тормош иптәше Лиана Илвир ҡыҙы менән сәстәрен-сәскә бәйләй һәм Өфөгә эшкә ҡайта. Лиана Илвир ҡыҙы Өфө дәүләт нефть техник университетын тамамлай. 2014 йылда йәш ғаилә Күмертауға ҡайтып төпләнә. Румил Әмир улы арматурасы булып эшләүен дауам итә, кәләше Күмертау вертолет заводына эколог булып эшкә урынлаша. Егетте тыуған ауылына мәктәпкә физкультура уҡытыусыһы итеп эшкә саҡырғас, 2016 йылда йәш ғаилә ауылға ҡайта. Шул уҡ ваҡытта күрше ауылда – кәләшенең тыуған ере Яҡшымбәттә тренер булып эшләй. Ике тәрбиәләнеүсеһе Башҡортостанда призлы урындар яулай. 2015 йылда – ҡыҙҙары Айлина, 2016 йылда икенсе ҡыҙҙары – Әҙилә, 2019 йылда улдары Камил тыуа. – Үҙем дә, ғаиләм дә спортты бик ныҡ ярата, районда үткән барлыҡ ярыштарҙа ҡатнашып торабыҙ, һәр ваҡыт призлы урындар алабыҙ. Ике ҡыҙым аэробика түңәрәгендә шөғөлләнә, улым бәләкәй булһа ла минең менән көрәшкә йөрөй, – тип уртаҡлашты Румил Әмир улы. 2019 йылда ғаилә Ермолаевка ауылында йорт һала башлай һәм ике йылдан яңы өй туйлайҙар. 2022 йылдан Румил Әмир улы Ермолаевкала Балалар-үҫмерҙәр спорт мәктәбендә тренер-уҡытыусы булып эшкә инә. – Мин балаларҙы яратам, уларҙы спортҡа ылыҡтырыу һәм шөғөлләндереү оҡшай. Тәрбиәләнеүселәремдең уңыштары минең өсөн ҙур ҡыуаныс. Яңыраҡ тағы бер уҡыусым Башҡортостан беренселегендә икенсе урын алды. Алла бирһә йәш спортсыларым Рәсәй чемпионы ла булыр, тип хыялланам, – тине Румил Ғайсин. Был йәш атайға ғаилә именлеге, эшендә уңыштар һәм яңы үрҙәр теләйбеҙ. Барлыҡ хыялдары тормошҡа ашһын. Фото: Румил Ғайсиндың ғаилә альбомынан.