27 февралдә Өфөнөң “Нур” дәүләт татар театрында Башҡортостан Башлығы Радий Хәбиров республиканың татар йәмәғәтселеге вәкилдәре менән милләт-ара татыулыҡты нығытыу, татар телен һәм мәҙәниәтен үҫтереү, социаль башланғыстарға булышлыҡ итеү мәсьәләләрен тикшерҙе. Башҡортостан Башлығы республикала милли телдәрҙе һәм мәҙәниәттәрҙе һаҡлау һәм үҫтереү өсөн бөтә шарттар булдырылыуын билдәләне. – Башҡортостанда бер миллионға яҡын татар йәшәй. Һеҙҙең йәмәғәт һәм мәғрифәтселек ойошмалары – татарҙарҙың милли-мәҙәни автономияһы, Татарҙар конгресы һәм башҡалар республика тормошонда ҙур роль уйнай. Шулай уҡ Өфөләге “Нур” татар театры республикалағы иң матур архитектура объекттарының береһе булып тора, – тине Башҡортостан Башлығы. Төбәк етәксеһе республика алдында торған мөһим бурыстарҙы – махсус хәрби операцияға, унда ҡатнашыусыларға һәм уларҙың ғаилә ағзаларына ярҙам итеү, шулай уҡ иҡтисадты үҫтереүҙе билдәләп үтте. – МХО-ға ярҙам итеү маҡсаты менән бөтә республика берләште. Ауыр ваҡыттарға һәм санкциялар индерелеүенә ҡарамаҫтан, беҙ иҡтисади үҫеште тәьмин итеүгә һәм төбәктең инвестиция йәлеп итеүсәнлеген арттырыуға өлгәштек. 2023 йылда ғына Башҡортостан иҡтисадына инвестициялар күләме һигеҙ процентҡа артҡан, – тип билдәләне Радий Хәбиров. Рәсәй Дәүләт Думаһы депутаты, Башҡортостан татарҙарының милли-мәҙәни автономияһы рәйесе Римма Үтәшева республика етәкселегенә милләт-ара татыулыҡты нығытҡаны һәм милли йәмәғәт ойошмаларына ярҙам иткәне өсөн рәхмәт белдерҙе. Ул быйыл ойошмаға 15 йыл тулыуын билдәләне һәм берләшмә тормошҡа ашырған төп проекттар тураһында һөйләне. Берләшмә рәйесе бер нисә тәҡдим индерҙе. Уларҙың береһе берләшмәнең мәҙәни-ағартыу проекттарына дәүләт ярҙамын киңәйтеү менән бәйле булды. Радий Хәбиров яуап итеп Башҡортостан Башлығының Гранттар фондына әүҙемерәк ғаризалар бирергә ҡушты. Тағы бер мәсьәлә – Өфөләге 84-се татар гимназияһын ремонтлау кәрәклеге күтәрелде. Башҡортостан Башлығы республиканың Мәғариф министрлығына уны мәктәптәрҙе капиталь ремонтлау федераль программаһына индереү мәсьәләһен тикшерергә ҡушты. Римма Үтәшева Башҡортостандың Халыҡтар дуҫлығы йорто өсөн яңы бина кәрәклеген дә билдәләне. Ойоштороу өсөн Өфөнөң тарихи үҙәгендәге биналарҙың береһен һайлап аласаҡтар, тине Радий Хәбиров. – Был мәсьәлә өсөнсө тапҡыр күтәрелә. Быға тиклем Халыҡтар дуҫлығы йорто темаһын Бөтә донъя башҡорттары ҡоролтайы һәм Башҡортостан Рустары соборы вәкилдәре яңғыратты. Тимәк, республикабыҙҙа халыҡтар дуҫлығы бар һәм яңы бина ысынлап кәрәк, – тип һыҙыҡ өҫтөнә алды төбәк Башлығы. “Башҡортостан татарҙары конгресы” йәмәғәт ойошмаһы рәйесе, республика Дәүләт Йыйылышы – Ҡоролтай депутаты Заһир Хәкимов берләшмәнең эш йүнәлештәре тураһында һөйләне. Улар иҫәбендә – татар телен, милли мәҙәниәтен һәм традицияларын һаҡлауға һәм үҫтереүгә йүнәлтелгән саралар. Берләшмәнең төп бурыстарының береһе – махсус хәрби операцияла ҡатнашыусыларға һәм уларҙың ғаилә ағзаларына ярҙам итеү. Татарҙар конгресы вәкилдәре ирекмәнлек эшендә һәм Донбасс төбәктәренә гуманитар ярҙам ойоштороуҙа әүҙем ҡатнаша. Заһир Хәкимов Башҡортостан Башлығына социомәҙәни проекттарға грант ярҙамы, шулай уҡ ауыл биләмәләрен үҫтереүгә ҙур иғтибар бүлгәне өсөн рәхмәт белдерҙе. Нефтекаманың ”Белем” күп профилле полилингваль татар мәктәбе директоры Илдар Мортазин әйтеүенсә, уҡыу йортонда 334 уҡыусы белем ала. Бында шөғөлләнергә теләүселәр һаны йылдан-йыл арта. Шуға күрә икенсе уҡыу корпусын төҙөү ихтыяжы бар. Был мәсьәләне яҡын арала Башҡортостан Хөкүмәтендәге эш кәңәшмәләренең береһендә тикшерәсәкбеҙ, тине төбәк етәксеһе. Шул уҡ ваҡытта республикабыҙ – Башҡортостан халыҡтары телдәрен өйрәнгән полилингваль гимназиялар селтәре үҫешкән берҙән-бер төбәк, тип билдәләне Радий Хәбиров. Журналист Зәлиә Ахунова Башҡортостан юлдаш телеканалының эфир селтәренә элек татар телендә сыҡҡан "Райхан" тапшырыуын ҡайтарыу мәсьәләһен күтәрҙе. Осрашыу барышында татар йәмәғәтселеге вәкилдәре Өфөлә легендар мотоуҙышсы Ғабдрахман Ҡадировҡа һәйкәл ҡуйырға тәҡдим итте. – Күптән түгел баш ҡалала Башҡортостандың беренсе президенты Мортаза Ғөбәйҙулла улы Рәхимовҡа һәйкәл астыҡ. Быйыл Өфөлә егерме йыл дауамында республика менән етәкселек иткән Миҙхәт Закир улы Шакировҡа һәйкәл ҡуйырға ниәтләйбеҙ. Һәм, әлбиттә, махсус хәрби операцияла ҡатнашыусы геройҙар мемориалын булдырыу бурысы тора, – тине Радий Хәбиров. – Киләсәктә Өфөлә бөйөк спортсы Ғабдрахман Ҡадировҡа һәм Башҡортостандың башҡа күренекле шәхестәренә һәйкәл ҡуясаҡбыҙ. Өфө фән һәм технологиялар университеты студенты Айгөл Рамаҙанова төбәк Башлығынан быйыл Башҡортостандың татар йәштәре форумын республика кимәлендә үткәреүҙе хуплауын һораны. Радий Хәбиров Йәштәр сәйәсәте буйынса дәүләт комитетына был сараны үткәреү буйынса тәҡдимдәр индерергә, уның форматын һәм көн тәртибен билдәләргә ҡушты. Осрашыу аҙағында Башҡортостан Башлығы Радий Хәбиров ҡатнашыусыларға, шулай уҡ татар милли-мәҙәни берләшмәләренең әүҙем эше өсөн рәхмәт белдерҙе. Фото: glavarb.ru