Илеш районының Үрмәт ауылы клубында үткән әҙәби-музыкаль кисәлә ҡатнашырға насип булды. Был матур сараны башҡорт теле һәм әҙәбиәте уҡытыусыһы Әлмира Фәнис ҡыҙы Ғимаҙова әҙерләп уҙғарҙы. Унда Илеш районы башҡорттары ҡоролтайы етәксеһе Илшат Сибәғәтуллин, “Аҡбуҙат” журналының баш мөхәррире Лариса Абдуллина, журналист Айгөл Ғәбитова, Башҡортостандың атҡаҙанған мәҙәниәт хеҙмәткәре, халыҡ йырҙарын оҫта башҡарыусы Рәсидә Мостафина, мәғариф бүлеге хеҙмәткәре Земфира Минһажева, ауыл халҡы, уҡытыусылар, хеҙмәт ветерандары, уҡыусылар ҡатнашты. Кисә яҡташ шағирҙарыбыҙ Роберт Миңнуллин, Ринат Хәйри һүҙҙәренә яҙылған йырҙар, уларҙың шиғырҙары менән үрелеп барҙы. Үрмәт ауылы егете Ринат Хәйриҙең тыуған яҡҡа арналған шиғырҙары бигерәк тә күңелгә ятты, уларҙы ҡатнашыусылар айырым бер хис менән һөйләне. Уҡыусылар ғына түгел, уҡытыусылар ҙа артистарса оҫта итеп йырҙар башҡарҙы. Илшат Сибәғәтуллиндың Лариса Абдуллина һүҙҙәренә үҙе яҙған йырҙарын, Рүзәл Ғәлиевтең, Рәсидә Мостафинаның Ринат Хәйри, Роберт Миңнуллин һүҙҙәренә яҙылған йырҙарын башҡарыуы кисәгә йәм өҫтәне. Ошондай саралар балаларҙа тыуған йортҡа, тыуған яҡҡа һөйөү, ғорурлыҡ хисе тәрбиәләй, яҡташтарыбыҙҙың ижадына ҡарата ҡыҙыҡһыныу уята. Уҡыусыларҙың бер-береһен уҙҙырып тасуири итеп шиғыр һөйләүендә, оҫта итеп йырлауында ла уҡытыусының оло хеҙмәте күренә. Бындай кисәләр куберәк булһын ине тигән теләк белдерҙе ауыл халҡы. Лариса Абдуллина балалар менән йәнле аралашты, журналдар бүләк итте. Тел, иман, шәжәрә тураһында мауыҡтырғыс итеп әңгәмәләште, шиғырҙарын уҡыны. Айгөл Ғәбитова журналист булып китеүендә “Аҡбуҙат” журналының йоғонтоһо тураһында һөйләне. Уҡыусылар яҡташтарыбыҙ Хәсән Саръян, Әхсән Баян, Марат Кәбиров, Зәлифә Кашапова һәм башҡаларҙың да ижадын өйрәнһен, үҙҙәрендә зауыҡ тәрбиәләһен, шиғри һүҙҙең рухи үҫеш өсөн ниндәй дәрәжәлә кәрәкле икәнен аңлаһын, ине тигән теләктә таралыштыҡ. Бөйөк Ватан һуғышында һәләк булған яугир-шағир Мәлих Харистың да бала сағы, үҫмер, йәшлек йылдары Үрмәт ауылында үткән. Уның ижадын да төплө өйрәнеп, исемен мәңгеләштереү өсөн хәтер кисәһе үткәрербеҙ, тигән теләктә ҡалды ауыл халҡы. Уны белгән, хәтерләгән кешеләрҙең хәтирәләрен яҙып алырға, таҡтаташ ҡуйырға, тигән тәҡдимдәр ҙә булды. Ғәлимә Ғәлиева, мәғариф хеҙмәте ветераны. Автор фотолары.