Салауат ҡалаһы хакимиәтендә “Бәләкәй һәм урта эшҡыуарлыҡ, шәхси эшҡыуарлыҡ башланғысына булышлыҡ итеү” милли проекты маҡсаттарына ярашлы үткәрелгән “Эшҡыуарлыҡ сәғәте” кәңәшмәһендә “Салауат ҡалаһы биләмәһендә глэмпинг урынаштырыу” инвестиция проекты ҡаралды. Проекттың маҡсаты – туристар ағымын йәлеп итеү, туризмды үҫтереү, шул иҫәптән Салауат биләмәһендә, Һабаш, Нурдәүләт, Ергән ауылдары янында глэмпингтар булдырыу. Проект шулай уҡ Башҡортостан мәҙәниәтенә һәм тәбиғәтенә ҡыҙыҡһыныуҙы арттырыуға, төбәк ҡунаҡтарын милли аш-һыу менән таныштырыуға йүнәлтелгән. Глэмпинг биләмәһендә дүрт катамаранды, дүрт ишкәкле кәмәне, шулай уҡ балыҡ тотоу өсөн кәрәкле инвентарҙы ҡуртымға биреү күҙаллана. Эко-парк кешенең физик, эмоциональ, рухи сәләмәтлеген ял итеү һәм нығытыу, сәләмәт йәшәү рәүешен һәм ғаилә ҡиммәттәрен һаҡлау өсөн кәрәкле шарттар булдырыуға йүнәлтелгән. Глэмпингта популяр ял – йылға буйында балыҡ тотоу. Һәр килгән кешегә тәбиғәт тынлығында балыҡ тоторға тәҡдим ителә. Балыҡты ярҙан да, кәмәне прокатҡа алып та ҡармаҡларға мөмкин. Балалы ғаиләләр өсөн катамаранды ҡуртымға алыу эше яйға һалынасаҡ. Кәңәшмә йомғаҡтары буйынса эшҡыуарға глэмпинг өсөн биләмәне Ялпа күле эргәһендә һәм Ағиҙелдең һул ярындағы аҫылмалы күперҙе ҡарарға тәҡдим ителде. Билдәле булыуынса, “Бәләкәй һәм урта эшҡыуарлыҡ, шәхси эшҡыуарлыҡ башланғысына булышлыҡ итеү” (национальный проект “Малое и среднее предпринимательство и поддержка индивидуальной предпринимательской инициативы”) милли проекты Рәсәй Президенты Владимир Путиндың май указы менән булдырылды. Фото: Салауат ҡалаһы хакимиәте.