Әминә Шафиҡова БР Милли музейында үткән министрлыҡ коллегияһы ултырышында БР Мәҙәниәт министрлығының 2023 йылдағы эшмәкәрлеге йомғаҡтарын һәм ағымдағы йылдың төп бурыстарын тәҡдим итте. Йәмғиәттең социаль-иҡтисади структураһының мөһим өлкәләренең береһе булараҡ мәҙәниәт өҫтөнлөгөнең асыҡ күрһәткесе булып финанслауҙың үҫеш динамикаһы тора. Был федераль кимәлдә лә, республика кимәлендә лә дәүләт мәҙәни сәйәсәте мәсьәләләренә иғтибарҙың артыуын сағылдыра. Мәҫәлән, һуңғы алты йылда мәҙәниәткә сығымдар 60 процентҡа артҡан. Мәҙәниәт учреждениелары йәлеп иткән бюджеттан тыш средстволар күләменең дә артыуы ҡыуандыра: биш йыл эсендә уларҙың килеме 1,9 тапҡырға үҫкән. Шул уҡ ваҡытта дәүләт учреждениелары 2023 йылда, 2018 йыл менән сағыштырғанда, ике тапҡырға күберәк аҡса йәлеп иткән. Һуңғы алты йылдың йомғаҡтары буйынса Республика халыҡ ижады үҙәге, БР Дәүләт академия симфоник оркестры һәм “Башҡортостан” киностудияһы – лидерҙар рәтендә. Күрһәткестәрҙең үҫеүе “Пушкин картаһы” менән бәйле, тип билдәләне Әминә Шафиҡова. Әйткәндәй, республикабыҙ мәҙәни сараларға йөрөү күрһәткесе буйынса РФ төбәктәре араһында, Мәскәү һәм Санкт-Петербургтан ғына ҡалышып, өсөнсө урында килә. Шулай уҡ республикабыҙҙың халыҡ-ара һәм бөтә Рәсәй мәҙәни ваҡиғаларының үҙәге булып ҡалыуы шатландыра. Рәсәй мәҙәниәтенә баһалап бөткөһөҙ ярҙам Рәсәй Президенты Владимир Путиндың “Мәҙәниәт” милли проектына, федераль программаларға һәм өҫтөнлөклө проекттарға ярашлы тормошҡа ашырыла. Бындай ярҙамдың республика өсөн әһәмиәте ҙур: 2023 йылда ғына ике яңы клуб төҙөлгән, егерме мәҙәниәт объекты, шул иҫәптән республика өсөн әһәмиәтле Ҡурсаҡ театры капиталь ремонтланған һәм реконструкцияланған, 113 учреждение яңыртылған һәм заманса ҡорамалдар менән йыһазландырылған. Башҡортостан Башлығы Радий Хәбировтың мөһим башланғысы булып “Ауыл мәҙәниәт хеҙмәткәре” программаһы тора. 2021 йылдан башлап ғәмәлгә ашырылған программа иң яҡшыларҙан иҫәпләнә. Коллегия ултырышы барышында Рәсәйҙә һәм донъяла республиканы уңышлы таныштырған бер нисә мәҙәниәт учреждениеһының ҡаҙаныштары билдәләнде. Сарала шулай уҡ кинематография, музейҙар, китапханалар эшмәкәрлеге баһаланды. Әминә Шафиҡова Рәсәйҙең яңы төбәктәрендә һәм махсус хәрби операция зонаһында мәҙәни миссияны үтәүселәргә айырым рәхмәт һүҙҙәре еткерҙе. Халыҡ-ара һәм төбәк-ара мәҙәни бәйләнештәр үҫеше дауам итә: 2023 йылда ”Һабантуй” милли байрамы Рәсәйҙең 17 төбәгендә һәм Үзбәкстан Республикаһында уҙғарылған. Ҡатнашыусыларҙың дөйөм күләме бер миллиондан ашыу кешене тәшкил иткән. Доклад аҙағында Әминә Шафиҡова хеҙмәттәштәренә берлектәге эше өсөн рәхмәт әйтте һәм республика мәҙәниәт командаһы алдына милли проектты һәм дәүләт программаларын тормошҡа ашырыуға, мәҙәниәт һәм сәнғәт өлкәһендәге бөтә күрһәткестәрҙе үтәүгә һәм планлаштырылған сараларҙы юғары кимәлдә үткәреүгә йүнәлтелгән бер нисә бурыс ҡуйҙы. Фото: pravitelstvorb.ru