“Торлаҡ төҙөлөшө өсөн аҡса туплау” программаһына 10 йыл тулды. Ул 2014 йылдың 14 февраленән тормошҡа ашырыла. Ошо ваҡыт эсендә 5,3 меңдән ашыу кеше торлаҡ алыуға аҡса туплаған, йорттар төҙөгән һәм торлаҡ майҙанын киңәйткән. Әле 3,5 меңдән ашыу ҡатнашыусы программа буйынса аҡса йыя. – Республика халыҡҡа торлаҡ шарттарын яҡшыртыуға аҡса тупларға һәм арттырырға ярҙам итә. Бының өсөн программала ҡатнашыусы һаҡлаған суммаға республика бюджетынан ай һайын 30 процент күләмендә премия бүленә. 2024 йылда ошо маҡсаттарға БР бюджетында 185 миллион һум аҡса ҡаралған, – тип билдәләп үтте БР Хөкүмәте Премьер-министры урынбаҫары – БР финанс министры Лира Иғтисамова. Программала Башҡортостан Республикаһының һәр бәлиғ булған гражданы ҡатнаша ала. Бының өсөн жсс-бр.рф сайтында йәки программаның партнер бүлексәһендә – “Уралсиб” банкында ғариза бирергә кәрәк. – “Торлаҡ төҙөлөшө өсөн аҡса туплау” программаһы үҫешә һәм яңыра бара. Мәҫәлән, былтыр премияның максималь күләме биш меңгә тиклем барып етте. Бынан алда льготалы категориялар исемлеге киңәйтелде, унда МХО-ла ҡатнашыусылар һәм уларҙың ғаилә ағзалары инде. Шулай уҡ төҙөүселәр өсөн программаның партнерҙары булыу мөмкинлеге барлыҡҡа килде, – тине "Башҡортостан Республикаһының финанс тикшеренеүҙәре үҙәге" директоры Евгений Декатов. Программа шарттары буйынса граждандар өс йылдан алты йылға тиклем тупланма торлаҡ вклады аса. Уның буйынса ставка йылына 1-1, 5 процент тәшкил итә, шулай уҡ ҡатнашыусының айлыҡ иғәнәһенә республика бюджетынан 30 процент күләмендә премия өҫтәлә (әммә айына биш меңдән артмаҫҡа тейеш). Минималь иғәнә – айына өс мең һум. Дәүләт премияһы ай һайын иҫәпләнә һәм квартал һайын аҡса һалыусы иҫәбенә күсерелә. Шуны билдәләргә кәрәк: әгәр программала ҡатнашыусы иғәнәләр яһауҙан туҡтаһа йәки тупланманы бөтөрөргә ҡарар итһә, премияны бюджетҡа кире ҡайтарырға тура киләсәк. Тупланған сумманы фатир йәки башҡа күсемһеҙ милек, шәхси төҙөлөш өсөн ер участкаһы һатып алыуға, йорт төҙөүгә, элек алынған ипотеканы ҡаплауға йәки йылына 5,5–7 процент менән льготалы ставка буйынса яңыһын рәсмиләштереүгә йүнәлтергә мөмкин. Фото: pravitelstvorb.ru