Башҡортостанда 2024 йылда 727 күп фатирлы йорт йүнәтелә һәм 143 ихата биләмәһе төҙөкләндерелә. Был хаҡта аҙналыҡ оператив кәңәшмә барышында торлаҡ-коммуналь хужалыҡ министры Ирина Голованова белдерҙе. 2024 йылда күп фатирлы йорттарҙа дөйөм мөлкәтте капиталь ремонтлау төбәк программаһы 727 күп фатирлы йортто үҙ эсенә ала. Планда – ҡыйыҡтарҙы ремонтлау һәм сарлаҡ таяуҙарын йылытыу, лифттарҙы алмаштырыу, фасадтарҙы, йылылыҡ, һыу, газ һәм электр менән тәьмин итеү системаларын яңыртыу һәм башҡа эш төрҙәре. Ошо маҡсатҡа 5,5 миллиард һум йүнәлтелә, шуның 702 миллион һумы – республика ҡаҙнаһынан. Аҙ ҡатлы күп фатирлы йорттарҙың ҡыйыҡтарын ремонтлауға айырым иғтибар бирелә. Быйыл ошо йүнәлештә финанслау күләме 430 миллион һумға тиклем арттырылды, был 127 йорттоң ҡыйығына өҫтәмә ремонт яһарға мөмкинлек бирергә тейеш. 77 күп фатирлы йортта капиталь ремонт башланған да инде. Дөйөм алғанда, фасадтарҙы һәм йылылыҡ менән тәьмин итеү системаларын яңыртыуҙы – йылытыу миҙгеле башланғансы, ҡалған эштәрҙе йыл аҙағына тиклем тамамлау күҙаллана. 2024 йылда подъездарҙы комплекслы ремонтлау программаһына 108 миллион һум йүнәлтелә. Был Өфөлә, Асҡын, Иглин, Шишмә һәм Стәрлебаш райондарында 38 күп фатирлы йорттоң 117 подъезын ремонтларға мөмкинлек бирә. Төҙөүселәр инеү ишектәрен тәртипкә килтерәсәк, стеналарҙы һәм түбәне буяясаҡ, ағас тәҙрәләрҙе пластикка алмаштырасаҡ, яңы тамбур ишеге, энергия һаҡлаусы яҡтыртҡыстар, почта йәшниктәре ҡуясаҡ. Программа сиктәрендә мөмкинлектәре сикләнгән кешеләр өсөн пандустар ҡуйыласаҡ. Подъездарҙы ремонтлау эштәренә – апрелдә тотонорға, һәм 2024 йылдың сентябрендә тамамларға ниәтләйҙәр. 2024 йылда “Башҡортостан ихаталары” республика программаһы 33 муниципалитетта 143 ихата биләмәһен төҙөкләндереүҙе күҙ уңында тота. Ошо маҡсатҡа төбәк ҡаҙнаһынан 1 миллиард һум бүленә. 30 сентябргә төҙөкләндереү эштәрен тамамлау көтөлә, бының өсөн подрядсылар 1 майға тиклем эшкә тотонорға тейеш. Башҡортостан Башлығы Радий Хәбиров “Төбәк капиталь ремонт операторы” генераль директоры Павел Сафоновҡа ямғыр ваҡытында йорттарҙы һәм подъездарҙы һыу баҫыу осраҡтарына юл ҡуймау өсөн ҡыйыҡтарҙы яңыртыу буйынса эштәрҙе башҡарыу ваҡытын аныҡ контролдә тоторға ҡушты. – Дөйөм алғанда, был ҙур, яҡшы һәм кәрәкле программалар, уларҙы халыҡ бик көтә, – тине Радий Хәбиров. – Халыҡ подрядсыларҙың ҡасан килерен аңлаһын өсөн 2025 йыл тураһында уйлана башларға кәрәк. Фото: Башҡортостан Башлығы сайты.