Күберәк төҙөйәсәкбеҙ

2024 йылдың ғинуарында Башҡортостан биләмәһендә 407 мең квадрат метр торлаҡ сафҡа индерелгән, был уҙған йылдың ошо уҡ күрһәткесенән 32 процентҡа күберәк. Бөгөнгө аҙналыҡ кәңәшмәлә республиканың төҙөлөш һәм архитектура министры вазифаһын башҡарыусы Владислав Сидоркин ошо хаҡта хәбәр итте. – Быйыл бөтәһе 3,35 миллион квадрат метр самаһы торлаҡ төҙөргә ниәтләйбеҙ, – тип өҫтәне ул. – Ә маҡсатлы күрһәткес 2030 йылға – йылына 4 миллион квадрат метр торлаҡ. Хәтерегеҙгә төшөрәбеҙ, 2023 йылда республикала 3,315 миллион квадрат метр төҙөлгән – 2022 йылғы кимәлдән 8 процентҡа күберәк. Торлаҡ төҙөү күләме буйынса Башҡортостан Волга буйы федераль округында – икенсе, Рәсәй төбәктәре араһында етенсе урында тора. Төҙөлөштөң дөйөм күрһәткесендә шәхси торлаҡ төҙөлөшөнөң өлөшө 63 процент тәшкил итә. Шәхси йорттар төҙөү ныҡ артыуына бәйле Башҡортостан Башлығы Радий Хәбиров республика Дәүләт Йыйылышы – Ҡоролтайға Мөрәжәғәтнамәһендә “Башҡорт йорто” төбәк программаһын әҙерләргә ҡушты. Ул йорттар һалыуҙы типлаштырылған проекттар буйынса системаға һалырға һәм ер участкаларын урындағы төҙөлөш материалдарын файҙаланып, инженерлыҡ инфраструктураһы менән тәьмин итергә мөмкинлек бирәсәк. Дәүләт программаһы концепцияһы әҙерлек стадияһында. Бынан тыш, 2023 йылда ипотека кредитлауы темпы артты. Башҡортостанда бөтәһе 84,1 мең ипотека кредиты бирелгән, был 2022 йыл күрһәткесенән 60 процентҡа күберәк. Ә уларҙың дөйөм суммаһы йыл эсендә 83 процентҡа артҡан. 2023 йылдың тағы бер мөһим йомғағы төҙөлөш тармағы өсөн өлөшсөләрҙең боҙолған хоҡуҡтарын тергеҙеү булған. Министр вазифаһын башҡарыусы Владислав Сидоркин һуңғы биш йылда 136 “һаҡаллы төҙөлөш”тө проблемалы объекттар реестрынан төшөрөп ҡалдырыуҙары тураһында хәбәр итте. Был 10 мең кешенең хоҡуҡтарын тергеҙергә мөмкинлек бирҙе. Башҡортостан Башлығы Радий Хәбиров министрлыҡ коллективына ошо йәһәттән һөҙөмтәле эшләгәне өсөн рәхмәт белдерҙе, шулай уҡ торлаҡ төҙөлөшөн артабан үҫтереү өсөн нигеҙ булдырыу кәрәклегенә иғтибар итте. – Беҙ Рәсәй Президентының алданған өлөшсөләр мәсьәләһен хәл итеү буйынса йөкләмәһен үтәнек. Башҡарған эштәрегеҙ өсөн рәхмәт, – тине республика етәксеһе. – 2030 йылға 4 миллион квадрат метр торлаҡты сафҡа индереү күрһәткесенә етеү өсөн билдәле бер нигеҙ әҙерләргә кәрәк. Макроиҡтисади факторҙар арҡаһында төҙөлөш материалдары хаҡының һиҙелерлек артыуын күрәбеҙ. Шуға күрә хаҡтар тотороҡлоғон һаҡлау өсөн күберәк торлаҡ төҙөү мөһим. Фото: Башҡортостан Башлығы сайты.