Улар йәмғиәтте яҡшыраҡ һәм яҡтыраҡ итә

Бөгөн, 27 февралдә, Бөтә донъя коммерцияға ҡарамаған ойошмалар көнө билдәләнә. Был датаны Ер шарының 80-дән ашыу илендә, шул иҫәптән Рәсәйҙә лә билдәләйҙәр. Башҡортостанда коммерцияға ҡарамаған ойошмалар эшмәкәрлеге 2018 йылдан ныҡлы үҫеш алды. Был башланғыстың нигеҙен Башҡортостан Башлығы Гранттары фонды тәшкил итә. Бөгөнгө иҫтәлекле көн айҡанлы Өфөләге “Арт-Квадрат” биләмәһендә тантаналы һәм эшлекле сара уҙҙы. Унда уңышлы эшләп килгән коммерцияға ҡарамаған ойошмалар, улар тарафынан тормошҡа ашырылған иң яҡшы проекттар билдәләнде. - Беҙҙең республикала 2018-2019 йылдарҙан коммерцияға ҡарамаған йәмәғәт ойошмаларына айырыуса ҙур иғтибар бирелә башланы. 2019 йылда граждандар йәмғиәте институттарын үҫтереүҙә әүҙем ҡатнашҡан һәм социаль әһәмиәтле проекттарҙы тормошҡа ашырған ошондай ойошмаларға дәүләт ярҙамы күрһәтеү маҡсатында Башҡортостан Башлығы Гранттары фонды булдырылды. Тәүге осорҙа ике конкурсҡа 90 миллион һум аҡса бүленде, был сумманың 50 миллионы – туған телдәрҙе үҫтереү буйынса, ҡалғаны социаль әһәмиәтле проекттарға йүнәлтелде. Йылдан-йыл бүленгән сумма ла, грант конкурстары ла арта бара. Һуңғыларын барлаһаҡ, киноиндустрияны үҫтереүгә, киң мәғлүмәт саралары ҡатнашлығында тормошҡа ашырылған проекттарға конкурстар иғлан ителде. 2018 йылдан алып бөгөнгәсә 600-ҙән ашыу коммерцияға ҡарамаған йәмәғәт ойошмаһы төрлө күләмдәге гранттар яуланы. Был эшмәкәрлеккә йәлеп ителгән кешеләр йәмғиәт өсөн бик әһәмиәтле эштәр алып бара, иҫ киткес матур башланғыстарҙы тормошҡа ашыра, - тип билдәләне БР Башлығы Хакимиәте етәксеһенең эске сәйәсәт буйынса беренсе урынбаҫары Урал Килсенбаев. БР Башлығы Гранттары фондының генераль директоры Люциә Сәйфуллина бөгөн алты йүнәлештәге конкурстың тормошҡа ашырылыуы, уларға республика ҡаҙнаһынан 280 миллион һум аҡса бүленеүе тураһында әйтте. Ул шулай уҡ әлеге эшмәкәрлек төрлө министрлыҡтарҙы һәм ведомстволарҙы берләштереүен билдәләне һәм киләсәктә лә ошо берҙәмлекте һаҡлап, йәмғиәтте яҡшыраҡ, уңайлыраҡ, йәмлерәк итеү өсөн эшләргә саҡырҙы. Бөтә донъя коммерцияға ҡарамаған ойошмалар көнө уңайынан 25 иң яҡшы проект билдәләнеп, уларҙы тормошҡа ашырыусы командаларға дипломдар, иҫтәлекле бүләктәр тапшырылды. Улар араһында Башҡортостан сәсәндәр үҙәгенең “Минең Рәми” шиғри конкурсы, Ишембай районынан “Ансар” халыҡты социаль хеҙмәтләндереү үҙәгенең “Үҙенсәлекле балалар йылмайһын” проекты, Өфө кесе авиация уҡыу-методика үҙәгенең “Осоу практикаһы: зәңгәр күк – ҡыйыуҙар өсөн!” проекты һ.б. бар ине. Иң яҡшы 25 проект араһына инмәһә лә, үҙенсәлекле башланғыстарға ҡыйыу тотонған, отчеттарҙы теүәл һәм ижади эшләгән ойошмалар ҙа билдәләнде. Сибай ҡалаһынан “Азатлыҡ” халыҡты социаль хеҙмәтләндереү үҙәге” коммерцияға ҡарамаған ойошмаһы “Йәш педагог. Актив” тигән проектты тормошҡа ашырыу барышында башҡорт телен өйрәнеү буйынса оҫталыҡ дәрестәре үткәргән. “Был эште Сибай педагогия колледжы һәм “Айгөл”, “Аленушка” балалар баҡсалары ҡатнашлығында тормошҡа ашырҙыҡ”, - ти ойошма етәксеһе Илһам Факил улы Әбделғужин. Сара барышында ошо уҡ ҡаланан “Батыр” йәштәр спорт-ял үҙәге” йәмғиәте етәксеһе Батыр Хөсәйен улы Йәндәүләтов - “Төньяҡ амурҙары”, “Аманат” ирекмәнлекте үҫтереү” йәмғиәте етәксеһе Азалия Марат ҡыҙы Әбдрәхимова ла иң яҡшылар рәтендә билдәләнде. Өфө ҡалаһынан “Старт” белем биреү башланғыстарын яҡлау үҙәге” йәмғиәте фәнни-проектлау марафонын уңышлы тормошҡа ашыра. Уның етәксеһе Ғаяз Әҡсән улы Ғәлиәкбәров был эшмәкәрлекте Республика инженер лицей-интернаты һәм “Аврора” таланттар үҫтереү үҙәге ҡатнашлығында ойоштороуҙары хаҡында әйтте. “Рәсәй бюджетында коммерцияға ҡарамаған ойошмаларҙың эшмәкәрлеге өсөн 50 миллиард һум самаһы сығым һалына. Әммә был сумманы сығым тип ҡарау дөрөҫ түгел, ул аҡса йәмғиәтте үҫтереүгә, кешеләргә ярҙам итеүгә, тимәк, тормошобоҙҙо яҡшыраҡ, яҡтыраҡ итеүгә йүнәлтелә”, тигән фекер яңғыраны сара барышында. Был һүҙҙәр менән килешмәү мөмкин түгел. Айрат Нурмөхәмәтов фотолары.