"Аңлағыҙ, ғәфү итегеҙ ти, уның балалары бәләкәй ти...

Иҫерек һәм водитель таныҡлығы булмаған ҡатын ойошторған аварияла 28 йәшлек ирҙең һәләк булыуы тураһында хәбәр иткәйнек инде. Кисә уны Стәрлетамаҡ районының Наумовка ауылында ерләгәндәр. Уның менән бәхилләшер өсөн бик күп дуҫтары, туғандары, таныштары килгән. Әле уның кемлеген “КП-Өфө” баҫмаһы асыҡлаған. Ир ике бала атаһы Григорий П. булып сыҡҡан. Авария шәмбе көндө Стәрлетамаҡта була. Киске туғыҙҙа Ырымбур трактында Suzuki SX4 менән Lada Granta машиналары бәрелешә. Һуңғараҡ асыҡланыуынса, сит ил маркалы машинала Салауат ҡалаһында йәшәгән 46 йәшлек ҡатын ултырған була. Ул иҫерек булып сыға һәм машинаһына идараны юғалтып, ҡаршы һыҙаттан тыныс ҡына килгән “Гранта”ға барып бәрелә. Шулай уҡ уның водитель таныҡлығы ла алынған булыуы асыҡлана. Григорий иһә әсәһе һәм йөрөгән ҡыҙы менән туғандарына тыуған көн билдәләргә китеп барған була. Бәрелеш тап водитель ултырған яҡҡа тура килә, шуға күрә ул ауыр йәрәхәттәр ала. Пассажирҙары имен ҡала. – Бәрелештән һуң хәүефһеҙлек мендәре эшләй, тик барыбер Гриша ныҡ итеп түше һәм эсе менән рулгә һуғыла. “Ашығыс ярҙам” машинаһы оҙаҡ килде, килгәс иһә 40 минут буйы кемлеген асыҡлап һорау алдылар. Дауаханаға алып киткән саҡта ул үҙ аңында ине. Унда табиптар УЗИ эшләр өсөн каталканан үҙенә күсеп ятырға ҡушалар, ә уның бик күп һөйәктәре һынған, аортаһы йәрәхәтләнгән. Эсендә өс литр самаһы ҡанын юғалтҡан. Һөҙөмтәлә ул дауаханала вафат булды, табиптар ҡотҡара алманы, – тип һөйләгән егеттең ағаһы. Аварияла ғәйепле ҡатындың йәрәхәттәре ауыр түгел, уның ҡабырғаһы ғына һынған. Әле ул дауаханала ята, ә палатаһын полиция һаҡлай. – Был ҡатын менән һөйләшмәнек әле. Уның һеңлеһе шылтыратты, ғәфү үтенде, аҡса тәҡдим итте. Аңлағыҙ, ғәфү итегеҙ ти, уның балалары бәләкәй ти... Ә бит Гришаның да алты һәм һигеҙ йәшлек ике балаһы ҡалды, улар тураһында кем уйлар? Ғәйепле ҡатын менән нимә тураһында һөйләшергә лә белмәйем, уның ғәйебе менән яҡшы кеше һәләк булды бит. Григорийҙың үлеме күптәр өсөн көтөлмәгән фажиғә булды. Ул йәш сағында диңгеҙ пехотаһында хеҙмәт иткән, үҙен ҡыйыу яугир итеп күрһәткән. Хеҙмәттән һуң ул таксиҙа һәм автомәктәптә инструктор булып эшләгән. Ә оҙаҡламай махсус хәрби операция биләмәһенә доброволец булып китергә йыйынған. “Тыныс йоҡла, яугир. Һин мәңгегә беҙҙең йөрәктәрҙә ҡалырһың”, – тип яҙа уның дуҫтары. Әлеге ваҡыта авария сәбәптәрен асыҡлайҙар, енәйәт эшен ҡуҙғатыу мәсьәләһе хәл ителә. Фото: КП-Өфө.