Премьер-министр Андрей Назаров етәкселегендә үткән Хөкүмәт ултырышында ҡайһы бер граждандар категорияһын төбәк бюджеты средстволары иҫәбенә реабилитациялау мәсьәләһе ҡаралды. –2024 йыл республикала Һаулыҡ мөмкинлектәре сикләнгән кешеләргә хәстәрлек күрһәтеү йылы итеп иғлан ителде. Һуңғы өс йылда инвалидтар һаны 250 мең кеше кимәлендә тотороҡло тора. Беҙ йыл һайын улар өсөн ярҙам сараларын арттырабыҙ, асыҡ мөхит һәм инфраструктура булдырыу өҫтөндә эшләйбеҙ, – тине Андрей Назаров. Премьер-министр республикала балалар реабилитацияһы инфраструктураһының ярайһы үҫешкәнлеген һәм биш реабилитация үҙәге һәм 18 филиал булыуын билдәләне. Көҙгә “Салют” республика реабилитация һәм белем биреү үҙәгенең үҙгәртеп ҡороуҙан һуң сафҡа индерелеүе көтөлә. Бында 192 урынлыҡ коррекция мәктәбе, ҡунаҡхана, инвалид балаларға дистанцияла белем биреү үҙәге эшләйәсәк. – Башҡортостан Башлығы тарафынан 18 йәштән өлкән инвалидтарға өҫтәмә ярҙам саралары – реабилитацияға сертификаттар биреү тураһында ҡарар ҡабул ителде. Бер кешегә сертификат номиналы 52,5 мең һум тәшкил итәсәк. Йыл һайын был сара менән 1715 кешене солғап аласаҡбыҙ, – тине Андрей Назаров. Ғаилә, хеҙмәт һәм халыҡты социаль яҡлау министры Ленара Иванова әйтеүенсә, былтыр инвалид балаларҙы реабилитациялауға 95 миллион һумдан ашыу аҡса тотонолған. –Республикала сертификаттар биреү тәртибе раҫланған. Хеҙмәткә һәләтле йәштәге инвалидтар һәм махсус хәрби операцияла ҡатнашыусылар өҫтөнлөк менән файҙаланасаҡ. Сертификатты файҙаланыу срогы – ике ай,– тине Ленара Иванова һәм сертификаттарҙы биреүҙең ошо йылдың март айында уҡ башланасағын белдерҙе. 18 йәштән өлкән инвалидтарға реабилитация хеҙмәттәре күрһәтеүгә йыл һайын республика бюджетынан 90-шар миллион һум йүнәлтеү планлаштырыла. Андрей Назаровтың әйтеүенсә, реабилитацияға сертификаттар биреү механизмын индереү сифатлы реабилитация хеҙмәттәренән файҙаланыу мөмкинлеген арттырасаҡ. Фото: https://pravitelstvorb.ru/news/23011/