Фәнис Кәримов "Башҡортостан" гәзитенең "Бәйләнештә" төркөмөндә ойошторолған "Өлгөлө атай" конкурсында ҡатнаша. Мәҡәлә геройының атаһы Фәсих Кәтип улы “Байрамғол” совхозында бригадир булып эшләһә лә, ғүмере буйы данлыҡлы “Ләйсән” бейеү ансамблендә сығыш яһай, “Башҡортостандың атҡаҙанған мәҙәниәт хеҙмәткәре” исеменә лайыҡ була. Атаһына эйәреп, Фәнис кескәй генә сағынан бейей башлай. Ғаилә байрамдарында, балалар баҡсаһындағы сараларҙа гел уны бейетер булалар. Үҫә төшкәс, шул йылдарҙа Уральск ҡасабаһында ойошторолған “Ирәмәл” өлгөлө балалар бейеү ансамблендә шөғөлләнә башлай. Танылған бейеүселәр Рәйес Низаметдинов һәм Рәзинә Хәзиева минең тәүге уҡытыусылары була. Уральск урта мәктәбендә туғыҙ класты тамамлағас, егет Учалы музыка училищеһының хореография бүлегенә уҡырға инә. Училищеның “Ҡойон” халыҡ бейеүҙәре ансамбле менән ҡайҙа ғына сығыш яһамай улар, хатта Испания сәхнәләрен дә дер һелкетәләр. Икенсе курстан һуң өлгөр егет уҡыуҙан тыш Учалы филармонияһында ла бейей башлай. 2003 йылда училищены уңышлы тамамлаған йәш белгесте Фәйзи Ғәскәров исемендәге дәүләт бейеү ансамбленә эшкә саҡыралар. Әммә унда оҙаҡ бейергә тура килмәй, һалдат бурысын үтәргә Ленинград өлкәһенә йүнәлә ул. Бер йыл хеҙмәт иткәс, уның профессиональ бейеүсе икәнлеген белеп, Санкт-Петербург ҡалаһындағы Көнбайыш хәрби округының йыр һәм бейеү ансамбленә һынау үтеп ҡарарға тәҡдим итәләр. Йыл буйы бейемәһә лә, тәүәккәлләргә була һалдат. Имтихан алыусыларға “Форт Перовский”ҙы тәҡдим итә. Сәхнәне дер һелкетеп сығыш яһап бөткәс, залда бер аҙ тынлыҡ урынлаша, шунан баһалама комиссияһы ағзалары дәррәү ҡул саба башлай. Икенсе бейеү итеп егет “Русская хлопушка”ны күрһәтә, уны ла бик йылы ҡабул итәләр. Әрме хеҙмәтенең икенсе өлөшөн һалдат данлыҡлы ансамбль бейеүсеһе булараҡ үтә. Рәсәй буйлап ҡайҙа ғына гастролдәрҙә булмайҙар, хатта Испания, Франция, Бельгия сәхнәләрендә лә сығыш яһайҙар. Әйткәндәй, Фәнис Кәримов ансамблдә бейегән беренсе башҡорт егете була. Иҫ киткес һәләтле егеткә әрме хеҙмәтен тултырғас та ансамблдә ҡалырға тәҡдим була, әммә күңеле тыуған яҡтарға тартыла. 2006 йылда ул “Ирәмәл” өлгөлө балалар бейеү ансамбленең етәксеһе итеп тәғәйенләнә. Ансамблдең төрлө кимәлдәге фестивалдәрҙә, конкурстарҙа яулаған урындарын һанап бөтөрлөк түгел. Иң мөһимдәрен атап китеү урынлы булыр: “Байыҡ” телевизион бейеү конкурсында ансамбль даими ҡатнашып, призлы урындар яулай, ике тапҡыр Гран-при ала, йыл аша ойошторолған “Сыңлы үксә”лә бер нисә тапҡыр еңеүсе була, 2018 йылда Ҡазанда үткән халыҡ-ара бейеү фестивалендә лә Гран-приға лайыҡ була. Шул уҡ ваҡытта “Ләйсән” халыҡ ансамблендә лә бейей Фәнис Кәримов. Тап шунда осрата ул буласаҡ тормош иптәшен. Әбйәлил һылыуы Гөлиә, Учалы мәҙәниәт һәм сәнғәт колледжын тамамлап, ансамблдә эшләгән була. Бөгөн Кәримовтар үҙ ҡулдары менән ике ҡатлы күркәм йорт һалып, Уральск ҡасабаһында йәшәй, өс бала үҫтерә. Улар ҙа бейергә ярата. Кәримовтар район ғына түгел, республика кимәлендәге төрлө конкурстарҙа ла ҡатнашып, үҙҙәрен күрһәтәләр. “Байыҡта” ла еңеү яулайҙар, әле “Ҡурай даны” конкурсының “Ижади ғаилә” номинацияһында ҡатнашалар. Гөлиә Ишдәүләт ҡыҙы һүҙ оҫтаһы ла. 2018 йылда Учалы Яҙыусылар ойошмаһы тарафынан республика грантына ойошторолған “Илһам сығанағы – Ирәмәл” конкурсы финалсыһы була. Фәнис Кәримов үҙе лә тиҫтәгә яҡын бейеү һалған. Өс йыл элек “Ҡалҡан” бейеү ансамблен ойоштора. Ҡыҫҡа ғына ваҡыт эсендә коллектив республика кимәлендә лә танылыу яуланы. Фәнис Кәримов фекеренсә, балаларҙы кескәй саҡтарынан бейергә өйрәтергә кәрәк. Киләсәктә лә яңы бейеүҙәр һалырға, ижадтан айырылмаҫҡа, бигерәк тә йәш быуын менән күберәк эшләргә, гастролдәргә йышыраҡ йөрөргә хыяллана геройыбыҙ. Бына шундай гел яңылыҡҡа ынтылған, маҡсатлы, әүҙем замандашыбыҙ йәшәй Учалыла. Тормошта ла, эшендә лә, ижадта ла уның яулайһы үрҙәре алда әле. Автор: Римма Солтанова. Фото: Фәнис Кәримовтың ғаилә архивынан.