"Башспирт"тың күрһәткестәре ҡыуандыра

2023 йыл йомғаҡтары буйынса, “Башспирт” компанияһының саф табышы – 24,5 миллиард һум килемдә 251 миллион һумға, ә етештереүҙе үҫтереүгә инвестицияларҙың дөйөм күләме 450 миллион һумға еткән. Был хаҡта предприятиеның генераль директоры Рәйеф Әбдрәхимов Башҡортостан Башлығы Радий Хәбиров уҙғарған аҙналыҡ оператив кәңәшмәлә хәбәр итте. – Беҙ республикалағы ҙур предприятиеларҙың докладтарын даими тыңлайбыҙ. Бөгөн “Башспирт” компанияһының 2023 йылдағы эшмәкәрлеге йомғаҡтарын һәм 2024 йылға пландарҙы ҡарайбыҙ, – тине Радий Хәбиров. Отчет йылында “Башспирт” үҙ тарихында тәүге тапҡыр 50 миллион литрҙан ашыу алкоголь продукцияһы етештерҙе, был 2022 йылға ҡарағанда 14 процентҡа күберәк. Ә уны һатыу 17 процентҡа, 50,8 миллион литрға тиклем артҡан. Ошондай динамиканы, шул иҫәптән республиканан ситкә 30 миллион литрҙан ашыу тейәп оҙатылған тауарҙарҙың 25 процентҡа артыуы тәьмин итте, тип аңлатты Рәиф Әбдрәхимов. – 2023 йылда предприятиеның табышы 23 процентҡа артты, ә түләнгән һалымдар суммаһы – 34 процентҡа, 16,5 миллиард һумға тиклем. Шуның менән бергә республика ҡаҙнаһына 5,7 миллиард һум ингән, – тине Рәйеф Әбдрәхимов. 2023 йыл йомғаҡтары буйынса, “Башспирт” үҙ тармағында иң тиҙ үҫешеүсе компанияға әүерелде һәм етештереү күләме буйынса бер йылда етенсе урындан бишенсегә күтәрелде, тип өҫтәне генераль директор. “Башспирт” социаль яуаплы предприятие булып тора, унда 1,9 мең кеше эшләй, тип билдәләне Рәиф Әбдрәхимов. 2023 йылда хеҙмәткәрҙәрҙең уртаса эш хаҡын 21 проценттан ашыуға, 52 мең һумға тиклем арттырҙылар. Компания махсус хәрби операцияла ҡатнашҡан хеҙмәткәрҙәргә, шулай уҡ уларҙың ғаилә ағзаларына даими ярҙам күрһәтә. Бынан тыш, 2023 йылда “Башспирт” етештереүҙе үҫтереүгә 450 миллион һум аҡса һалды. Мәҫәлән, компания Өфөлә яңы складты файҙаланыуға тапшырҙы, Булгаков һәм Стәрлетамаҡ филиалдарын тотороҡло электр менән тәьмин итеү буйынса эштәр башҡарҙы, спирт һаҡлағыс төҙөнө, автопаркты һәм техниканы яңыртты. “Башспирт” Стәрлетамаҡ филиалында ла етештереү цехын яңыртыуға тотондо. Башҡортостан Башлығы Радий Хәбиров “Башспирт” коллективына һөҙөмтәле эшләгәндәре өсөн рәхмәт белдерҙе. – Продукция күләме артты, ярайһы уҡ табыш ала башланыҡ. Табыш, һалымдар ҙа арта. Хеҙмәткәрҙәргә эш хаҡын күтәрҙеләр һәм предприятиела ҡыҫҡартыуҙар юҡ, – тип йомғаҡ яһаны Радий Хәбиров. – Беҙ яҡшы күрһәткестәргә шатбыҙ, ләкин артабан барырға кәрәк. Фото: Башҡортостан Башлығы сайты.