Депутат район уҡыусыларына 42 пар саңғы бүләк иткән

“Красноусол” шифаханаһының генераль директоры, Дәүләт Йыйылышы – Ҡоролтай депутаты, медицина фәндәре докторы, Рәсәйҙең һәм Башҡортостандың атҡаҙанған табибы Рәмил Рафаил улы Бәҙретдинов "Атайсал" республика проекты сиктәрендә Ғафури районы уҡыусыларына 42 пар саңғы, саңғы аяҡ кейеме һәм таяғы бүләк иткән. Саңғылар Ҡауарҙы, Красноусол, Имәндәш һәм Йөҙимән ауылдары мәктәптәренә тапшырылған. Хәтерегеҙгә төшөрәбеҙ, "Атайсал" йәки "Бәләкәй Ватанға ярҙам ит!" программаһы республика Башлығы Радий Фәрит улы Хәбиров башланғысы менән ойошторолдо. “Мәктәптәрҙә ҡыш көнө уҡыусыларға тулы дәрестәр үткәреү мөмкинлеге булмай – саңғы юҡ ине. Һәр дәрескә өйҙә булған саңғыларҙы мәктәпкә алып килеү – балалар өсөн ауыр йөк. Шулай уҡ һәр ғаилә балаһына саңғы комплекты һатып ала алмай. Уҡыусылар саңғыла шыуырға ярата. Был ҡышҡы спорт төрөн нисек яратмаҫҡа? Саңғыла шыуыу иммунитетты нығыта, ысын ләззәт килтерә, кәйефте күтәрә. Физкультура дәрестәрендә саңғыла шыуыу ҡышҡы айҙарҙа балаларҙың саф һауаға һәм ҡояш яҡтылығына ихтыяжын бик яҡшы ҡәнәғәтләндерә. Мин, БАССР-ҙың йыйылма командаһы ағзаһы булараҡ (1977 – 1981 йылдар), БАССР-ҙың абсолют чемпионы (1978 йыл), СССР һәм РСФСР-ҙың Һаулыҡ һаҡлау министрлығының күп тапҡыр чемпионы, һаулыҡты һаҡларға һәм мотлаҡ спорт менән шөғөлләнергә кәрәклеген билдәләйем. Саңғылар һәр йәшкә бик яҡшы тура килә. Тик өлкән быуынға уларҙа конькиҙа йөрөгән кеүек түгел, ә классик хәрәкәттә шыуыу яҡшыраҡ. Кәңәш: тәбиғәттә күберәк йөрөгөҙ. Ялда мин тиҫтәләрсә мең аҙым үтеп, үҙемде бик яҡшы тоям! Уҡыусыларҙың барыһына ла спортта ғына түгел, уҡыуҙа ла уңыштар теләйем!” – тип уртаҡлашты Рәмил Рафаил улы. Әйткәндәй, 11 февралдә Бөтә Рәсәй “Рәсәй саңғыһы-2024” күмәк саңғы ярышы үтә. "Рәсәй саңғыһы" 1982 йылдан алып ойошторола һәм ҡатнашыусылар һаны һәм географик яҡтыртыу буйынса бөтә донъяла иң ҙур ҡышҡы спорт сараһы булып тора. Ярышта һәүәҫкәрҙәр ҙә, профессиональ спортсылар ҙа ҡатнаша ала. “Рәсәй саңғыһы” халыҡты ҡышҡы спорт төрҙәре менән әүҙем шөғөлләнеүгә йәлеп итеүгә, сәләмәт йәшәү рәүешен пропагандалауға, күмәк физкультура хәрәкәтен үҫтереүгә, саңғы спортын популярлаштырыуға йүнәлтелгән. Фото: vk.com/ramilbadretdinov, Рамиль Бадретдинов