По ссылке на страницу последования богослужения можно скачать в разных форматах службу на 25 февраля 2024 г. Неделя о мытаре и фарисее. Иверской иконы Божией Матери. Глас 5.
Прямая ссылка на полное последование богослужения 25 февраля 2024 г. на резервной странице.
Резервная страница проекта: https://posledovanie.my1.ru/index/0-2
Телеграм канал проекта: https://t.me/posledovanie/
Телеграм чат: https://t.me/ChatPosledovanie
ВКонтакте группа: https://vk.com/posledovanie
Поддержать Последование: молитвой, репостом, добрым словом или материально: http://posledovanie.ru/pomoshch-saytu/
Избранные тексты богослужения:
Тропа́рь воскре́сный, глас 5:
Собезнача́льное Сло́во Отцу́ и Ду́хови,/ от Де́вы ро́ждшееся на Спасе́ние на́ше,/ воспои́м, ве́рнии, и поклони́мся;/ я́ко благоволи́ Пло́тию взы́ти на Крест,/ и смерть претерпе́ти,/ и воскреси́ти уме́ршия// сла́вным воскресе́нием Свои́м.
Тропа́рь И́верской ико́ны Бо́жией Ма́тери, глас 1:
Де́рзость ненави́дящих о́браз Госпо́день/ и держа́ва нечести́вых безбо́жно в Нике́ю прии́де,/ и по́сланнии безчелове́чно вдови́цу,/ благоче́стно чту́щую ико́ну Богома́тери, истязу́ют,/ но та́я но́щию с сы́ном ико́ну в мо́ре пусти́, вопию́щи:/ сла́ва Тебе́, Чи́стая,/ я́ко непроходи́мое мо́ре плещи́ своя́ подаде́,// сла́ва правоше́ствию Твоему́, Еди́на Нетле́нная.
Друго́й И́верской ико́ны Бо́жией Ма́тери, глас 1:
От святы́я ико́ны Твоея́,/ о Влады́чице Богоро́дице,/ исцеле́ния и цельбы́ подаю́тся оби́льно/ с ве́рою и любо́вию приходя́щим к ней,/ та́ко и мою́ не́мощь посети́,/ и ду́шу мою́ поми́луй, Блага́я,/ и те́ло исцели́// благода́тию Твое́ю, Пречи́стая.
Конда́к воскре́сный, глас 5, подо́бен: «Собезнача́льное Сло́во…»:
Ко а́ду, Спа́се мой, соше́л еси́,/ и врата́ сокруши́вый я́ко всеси́лен,/ уме́рших, я́ко Созда́тель, совоскреси́л еси́,/ и сме́рти жа́ло сокруши́л еси́,/ и Ада́м от кля́твы изба́влен бысть, Человеколю́бче;/ те́мже вси зове́м:// спаси́ нас, Го́споди.
Конда́к из Трио́ди, глас 3, подо́бен: «Де́ва днесь …»:
Воздыха́ния принесе́м мыта́рская Го́сподеви,/ и к Нему́ присту́пим гре́шнии я́ко Влады́це:/ хо́щет бо спасе́ния всех челове́ков,/ оставле́ние подае́т всем ка́ющимся./ Нас бо ра́ди воплоти́ся,// Бог сый Отцу́ собезнача́льный.
Конда́к И́верской ико́ны Бо́жией Ма́тери, глас 4, подо́бен: «Яви́лся еси́ днесь вселе́нней…»:
Совозсия́ днесь Све́ту Воскресе́ния свет чи́стыя ико́ны Твоея́,/ обоя́ ве́село торжеству́юще вопием:// сохрани́ раб Твои́х благода́тию, Влады́чице.
Друго́й Конда́к И́верской ико́ны Бо́жией Ма́тери, глас 8:
А́ще и в мо́ре вве́ржена бысть свята́я ико́на Твоя́, Богоро́дице,/ от вдови́цы, не могу́щия спасти́ сию́ от враго́в,/ но яви́лася есть храни́тельница Афо́на/ и врата́рница оби́тели И́верския, враги́ устраша́ющая/ и в правосла́вней Росси́йстей стране́// чту́щия Тя от всех бед и напа́стей избавля́ющая.
Проки́мен воскре́сный, глас 5:
Ты, Го́споди, сохрани́ши ны, и соблюде́ши ны/ от ро́да сего́ и во век.
Стих: Спаси́ мя, Го́споди, я́ко оскуде́ преподо́бный.
Проки́мен Богоро́дицы, глас 3, песнь Богоро́дицы:
Вели́чит душа́ Моя́ Го́спода,/ и возра́довася дух Мой о Бо́зе Спа́се Мое́м.
Апо́стол:
Чте́ние Неде́ли о мытаре́ и фарисе́е (2Тим., зач.296.: гл.3, стт.10-15):
Ча́до Тимофе́е, ты после́довал еси́ моему́ уче́нию, житию́, приве́ту, ве́ре, долготерпе́нию, любви́, терпе́нию, изгна́нием, страда́нием, якова́ ми бы́ша во Антиохи́и, и во Икони́и, и в Ли́стрех, якова́ изгна́ния прия́х, и от всех мя изба́вил есть Госпо́дь. И вси же хотя́щии благоче́стно жи́ти о Христе́ Иису́се гони́ми бу́дут. Лука́вии же челове́цы и чароде́и преуспе́ют на го́ршее, прельща́юще и прельща́еми. Ты же пребыва́й в ни́хже науче́н еси́ и я́же вве́рена суть тебе́, ве́дый, от кого́ научи́лся еси́. И я́ко из мла́да свяще́нная писа́ния уме́еши, могу́щая тя умудри́ти во спасе́ние ве́рою, я́же о Христе́ Иису́се.
Чте́ние Богоро́дицы (Флп., зач.240: гл.2, ст.5-11):
Бра́тие, сие́ да му́дрствуется в вас, е́же и во Христе́ Иису́се, И́же во о́бразе Бо́жии сый, не восхище́нием непщева́ бы́ти ра́вен Бо́гу. Но Себе́ ума́лил, зрак раба́ прии́м, в подо́бии челове́честем быв, и о́бразом обре́теся я́коже челове́к. Смири́л Себе́, послушли́в быв да́же до сме́рти, сме́рти же кре́стныя. Те́мже и Бог Его́ превознесе́ и дарова́ Ему́ и́мя, е́же па́че вся́каго и́мене, да о и́мени Иису́сове вся́ко коле́но поклони́тся небе́сных и земны́х и преиспо́дних, и всяк язы́к испове́сть, я́ко Госпо́дь Иису́с Христо́с в сла́ву Бо́га Отца́.
Аллилуа́рий воскре́сный, глас 5:
Ми́лости Твоя́, Го́споди, во век воспою́, в род и род возвещу́ и́стину Твою́ усты́ мои́ми.
Зане́ рекл еси́: в век ми́лость сози́ждется, на небесе́х угото́вится и́стина Твоя́.
Аллилуа́рий Богоро́дицы, глас 8:
Слы́ши дщи и виждь, и приклони́ у́хо Твое́.
Ева́нгелие:
Чтение Неде́ли о мытаре́ и фарисе́е (Лк., зач.89: гл.18, стт.10-14):
Рече́ Госпо́дь при́тчу сию́: челове́ка два внидо́ста в це́рковь помоли́тися, еди́н фарисе́й, а други́й мыта́рь. Фарисе́й же став, си́це в себе́ моля́шеся: Бо́же, хвалу́ Тебе́ воздаю́, я́ко несмь я́коже про́чии челове́цы, хи́щницы, непра́ведницы, прелюбоде́е, или́ я́коже сей мыта́рь. Пощу́ся двакра́ты в суббо́ту, десяти́ну даю́ всего́ ели́ко притяжу́. Мыта́рь же издале́ча стоя́, не хотя́ше ни о́чию возвести́ на не́бо, но бия́ше пе́рси своя́, глаго́ля: Бо́же, ми́лостив бу́ди мне гре́шнику. Глаго́лю вам, я́ко сни́де сей оправда́н в дом свой па́че о́наго, я́ко всяк вознося́йся смири́тся, смиря́яй же себе́ вознесе́тся.
Чте́ние Богоро́дицы (Лк., зач.54: гл.10, стт.38-42, гл.11, стт.27-28):
Во вре́мя о́но, вни́де Иису́с в весь не́кую, жена́ же не́кая и́менем Ма́рфа прия́т Его́ в дом свой. И сестра́ ей бе нарица́емая Мари́а, я́же и се́дши при ногу́ Иису́сову, слы́шаше сло́во Его́. Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя оста́ви служи́ти; рцы у́бо ей, да ми помо́жет. Отвеща́в же Иису́с, рече́ ей: Ма́рфо, Ма́рфо, пече́шися и мо́лвиши о мно́зе. Еди́но же есть на потре́бу. Мари́а же благу́ю часть избра́, я́же не оты́мется от нея́. Бысть же егда́ глаго́лаше сия́, воздви́гши не́кая жена́ глас от наро́да, рече́ Ему́: блаже́но чре́во носи́вшее Тя, и сосца́, я́же еси́ ссал. Он же рече́: те́мже у́бо блаже́ни слы́шащии сло́во Бо́жие, и храня́ще е́.
Прича́стны воскре́сный и Богоро́дицы:
Хвали́те Го́спода с небе́с,/ хвали́те Его́ в вы́шних.
Ча́шу спасе́ния прииму́ и И́мя Госпо́дне призову́. Аллилу́ия. (Трижды)