Көслө буран-дауылмы йәки өшәнес ямғыр-ҡармы, сатлама һыуыҡмы, тәбиғәттең ниндәй генә күренеше булмаһын, маҡсатлылар, тырыштар, сәмселдәр алға ынтыла. Бигерәк тә ғаилә ышығында көс-дәрт, иртәге көнгә ышаныс туплағандар өсөн был көйһөҙлөктәрҙе генә түгел, тормош ауырлыҡтарын да бергә еңелерәк үткәрә. Ни тиһәң дә, ғаилә - ул ҡәлғә, көс-нур сығанағы, йәшәү йәме. Был донъяла “балам”, “әсәйем”, “атайым” тип өндәшер ғәзиз яҡындарың, ”ғаиләм” тип әйтер тормош маяғың булыуға бер ни етмәй! Тап шуға ла быйыл Рәсәйҙә Ғаилә йылы иғлан ителде. "Ғаиләне яҡлау, традицион ғаилә ҡиммәттәрен һаҡлау өлкәһендә дәүләт сәйәсәтен популярлаштырыу маҡсатында 2024 йылда Рәсәйҙә Ғаилә йылын үткәрергә ҡарар итәм”, — тиелгән Рәсәй Президенты Владимир Путин ҡул ҡуйған Указда ла. Бөгөн Ғафури районының Яугилде ауылында, республика “Айыҡ ауыл” конкурсына ярашлы, Ғаилә йылы тантаналы асылды. Беҙ бөгөн эш сәфәре менән барған был ауыл Бурлы ауыл биләмәһенә ҡарай. Тап Яугилде “Айыҡ ауыл” конкурсының муниципаль этабында еңеүсе тип табылды. Был ауылдың республика кимәлендәге конкурста ҡатнашыу хоҡуғын яулауы – үҙе үк ҡыуаныслы күренеш. Ә сараға яугилделәр бик етди әҙерләнде, бай йөкмәткеле күргәҙмәләр ҡуйылды. Ғафури районы мәҙәниәте вәкилдәренең, халыҡ таланттарының сығышы сараға тағы йәм өҫтәне. Был матур сәбәп айҡанлы Ғафури районы өлгөлө ғаиләләре йыйылғайны. Яугилде ауылы имам-хатибы Нәғим хәҙрәт сараға фатиха биреү өсөн сәхнәгә сыҡты. Сарала Ғафури районы хакимиәте башлығы Фәнзил Фәиз улы Сыңғыҙов, Башҡортостан Дәүләт Йыйылышы – Ҡоролтай рәйесе урынбаҫары Рөстәм Рифат улы Ишмөхәмәтов, Ғафури район советы һәм район башҡорттары ҡоролтайы рәйесе Фаил Һиҙиәт улы Зәйнетдинов, Ғафури районы хакимиәте башлығының социаль мәсьәләләр буйынса урынбаҫары вазифаһын башҡарыусы Зөһрә Рауил ҡыҙы Әхтәмова, Башҡортостан Милли архивы директоры урынбаҫары, сығышы менән Яугилде ауылынан булған Ниязбай Булатбай улы Сәлимов, Бурлы ауыл биләмәһе хакимиәте башлығы Рәүфә Ғәбдрәхим ҡыҙы Хәйретдинова, райондың башҡа ауыл биләмәһе хакимиәттәре башлыҡтары, вәкилдәре ҡатнашты. Ошо уҡ көндө ғаилә ҡиммәттәрен һаҡлаған, райондың ижтимағи-сәйәси тормошонда ҡайнап йәшәгән ғаиләләр – Гөлнур менән Ким Ғәлиәхмәтовтарға, Гөлнара менән Рәзил Нәзировтарға Ғафури районы хакимиәтенең рәхмәте белдерелде. Бөтә донъя башҡорттары ҡоролтайы ҡарарҙарын тормошҡа ашырыуҙа, халҡыбыҙҙың мәҙәниәтен, тарихын үҫтереүҙә, йолаларыбыҙҙы пропагандалауҙа, “Айыҡ ауыл” конкурсы сараларында әүҙем ҡатнашҡан Айгөл менән Рауил Солтанморатовтар, Гөлшат менән Шамил Хәйретдиновтар, Алһыу менән Альберт Мөхәмәтҡоловтарға Рәхмәт хаты тапшырылды. Ошондай уҡ бүләккә ғаилә ҡиммәттәрен нығытыуға һәм һаҡлауға ҙур өлөш индергән Ирина менән Илнур Ишмөхәмәтовтар, Эльвира менән Әхәт Боранғоловтар, Рәзилә менән Нәғим Дәүләтбаевтар лайыҡ булды. Яугилде ауылынан Нәзировтар, Бәләкәй Үтәштән Сабитовтар, Ташаҫтынан Зәйнәшевтәр, Ҡауарҙынан Сөләймәновтар, Сәйетбабанан Шаһиевтар, Әхмәт ауылынан Масловтар, Ҡурғашлынан Батталовтар, Ташлынан Воронцовтар, Үтәктән Камаловтар, Яңғыҙҡайындан Сабитовтар үҙ көсөн һынаны. Бөгөн шулай уҡ Яугилделә, “Айыҡ ауылы” конкурсына ярашлы, уҡтан атыу буйынса асыҡ турнир үткәрелде. Унда республикабыҙҙың төрлө мөйөштәренән был милли спорт төрөн үҙ итеүселәр ҡатнашты. Был саралар хаҡында тулыраҡ “Башҡортостан” гәзитенең киләһе һандарының береһендә уҡығыҙ. Автор видеоһы. Айрат Нурмөхәмәтов фотолары.