Беларусь - беҙҙең өсөн төп һәм бик яҡын уҙаҡташ

9 февралдә Минскиҙа “Башҡортостан – Беларусь” бизнес-форумы майҙансығында Башҡортостан Башлығы Радий Хәбиров һәм Беларусь Республикаһы Премьер-министры Роман Головченко журналистарға ике яҡлы хеҙмәттәшлекте үҫтереү принциптары һәм алымдары тураһында һөйләне. Матбуғат хеҙмәткәрҙәре менән осрашыуҙан: ХӘБӘРСЕ: – Роман Александрович, Башҡортостан менән берлектәге проекттарҙы тормошҡа ашырыуҙа ниндәйҙер ҡыйынлыҡтар бармы? РОМАН ГОЛОВЧЕНКО: – Ҡатмарлыҡтар юҡ. “Ятҡан таш аҫтына һыу аҡмай” тигән әйтем бар. Һәм, образлы әйткәндә, һыу әүҙемерәк аҡһын өсөн, был ташты даими әйләндерергә кәрәк. Бөгөн Андрей Геннадьевич Назаров (А.Г. Назаров, Башҡортостан Хөкүмәте Премьер-министры) илдәрҙең исемдәре ҡыҫҡартылған аббревиатураларҙың бер төрлө булыуына иғтибар итте. Шулай итеп, беҙҙә “РБ квадратта” бар. Дөйөм алғанда, беҙ бергәләп эшләүҙең тәбиғи ритмына сыҡтыҡ. Күп һанлы саралар үтә, уларҙы күҙ уңында тотоу зарур. Иң мөһиме, Радий Фәрит улы әйткәнсә, килешеүҙәрҙең нисек үтәлеүен контролдә тотоу ғына түгел, ә ҡабул ителгән ҡарарҙарҙы әҙерләү һәм уларҙы практик яҫылыҡҡа күсереү буйынса Хөкүмәт ағзаларына даими рәүештә тейешле маҡсаттыр булдырыу һәм биреү мөһим. Шуға күрә беҙ бының өсөн шарттар тыуҙырабыҙ һәм, талап ителгәс, осрашабыҙ. Әгәр эш һөҙөмтәләре буйынса нимәлер килеп сыҡмаһа, беҙ уларҙы ваҡытлыса ситкә ҡуйып, яңы башланғыстар менән шөғөлләнәбеҙ. Маҡсат – беҙҙең арала бер миллиард доллар күләмендә тауар әйләнешенә сығыу. Шуға күрә берлектәге яңы проекттар булдырырға кәрәк. Сауҙалашыу буласаҡ, ул бер ҡайҙа ла китмәйәсәк. Сәнәғәт кооперацияһының яңы этаптарына сығыу мөһим. Беларусь Республикаһы өсөн был өҫтөнлөклө йүнәлеш, шуға күрә дуҫтарыбыҙ, уҙаҡташтарыбыҙ, Башҡортостан етәкселеге менән фекер алышыуҙы дауам итәсәкбеҙ. ХӘБӘРСЕ: – Радий Фәрит улы, һеҙ форумда Өфө - Минск рейстарын арттырырға ниәтләүегеҙҙе әйттегеҙ. Был рейстарҙың тулыланыуына бизнес һәм туристик проекттар үҫеше булышлыҡ итергә тейеш. Һеҙҙең сәфәрегеҙ сиктәрендә һөйләшеүҙәр һәм осрашыуҙар үткәрелде лә инде. Уларҙан ниндәй һөҙөмтәләр көтөлә? Радий ХӘБИРОВ: – Беҙ алдан билдәләгән пландарҙы тормошҡа ашырыу йәки хатта тамамланыу стадияһында. Шуға күрә бер урында тормаҫ өсөн – ә тормош бик етеҙ үҫешә һәм көнәркәшлек көслө – беҙгә даими рәүештә яңы ҡарарҙар уйлап табырға кәрәк. Был хаҡта Роман Александрович менән һөйләшеп килештек. Һәм ике яҡтан да билдәле бер тәҡдимдәр индерелгән дә инде. Был тышҡы иҡтисади мөнәсәбәттәргә, сәнәғәт кооперацияһына, мәҙәни-гуманитар өлкәгә ҡағыла. Һәм был, ысынлап та, авиарейстарҙың тулыланыуына йоғонто яһаясаҡ. Тәүҙә беҙ ярҙам итәсәкбеҙ, бындай ташыуҙарҙы субсидиялаясаҡбыҙ. Беҙ Башҡортостан һәм Беларусь халҡын сәйәхәт итеүгә ылыҡтырырға теләйбеҙ. Был бик мөһим эш, ул тәрән иҡтисади һөҙөмтә лә килтерә. Шулай уҡ сәфәр сиктәрендә мәҙәни һәм спорт хеҙмәттәшлеге йәһәтенән бер нисә проект тәҡдим иттек. Беҙ ҙур театрҙарыбыҙ етәкселеге менән һөйләшеүҙәр үткәрҙек – улар Беларусь халҡын үҙҙәренең ижады менән ҡыуандырыу өсөн гастролдәргә ҙур теләк менән киләсәк. Музей экспозициялары менән алмашыуҙы ла билдәләйҙәр. Дөйөм алғанда, Беларусь беҙҙең өсөн төп һәм бик яҡын уҙаҡташ, бында эшләү бик шәп, тип әйтергә теләйем. 2021 йылда Беларусь Президенты Александр Григорьевич Лукашенко менән осрашыу ваҡытында беҙ уның ярҙамын һәм йөкләмәләрен алдыҡ, хәҙер уларҙы һөҙөмтәле үтәйбеҙ. Фото һәм мәғлүмәт сығанағы: glavarb.ru.