9 февралдә Минскиҙа Башҡортостан Башлығы Радий Хәбиров менән Беларусь Премьер-министры Роман Головченко Минск ратушаһы янында барған “Ҡунаҡсыл Башҡортостан” гастрономия фестивалендә булды. Фестиваль майҙансығында республикабыҙ халыҡтарының бай кулинар һәм мәҙәни традициялары тәҡдим ителде. Радий Хәбиров һәм Роман Головченко республиканың традицион кейемдәре һәм биҙәүестәре күргәҙмә-йәрминкәһендә булды, кулинар продукцияны тәмләп ҡараны һәм “Башҡортостан - Беларусь оҙон ғүмерлелеге” программаһы сиктәрендә Минскиға килгән туристар менән аралашты. – Беҙҙең өсөн Минск буйлап экскурсия ойошторолдо ла инде. Бойондороҡһоҙлоҡ майҙанын, иҫке ҡаланы һәм ратуша майҙанын ҡараныҡ, Минскиҙың Собор мәсетен ҡараныҡ, – тип тәьҫораттары менән уртаҡлашты Бөрө, Бөрйән һәм Мәсетле райондары туристары. – Беҙ шулай уҡ ЮНЕСКО-ның бөтә донъя мираҫы ҡомартҡыларын: мөһабәт Мирский һарайын һәм Несвижда сағыу һарай-парк комплексын күрҙек. Беҙҙе һәр ерҙә бик йылы ҡаршы алалар. Минск - бик матур һәм таҙа ҡала. “Башҡортостан - Беларусь оҙон ғүмерлелеге” программаһы буйынса сәйәхәт итеү мөмкинлеге өсөн рәхмәт. Радий Хәбиров быйыл Белоруссияға Башҡортостандан 1500 самаһы кеше киләсәген билдәләне һәм Роман Головченкоға туристик проектҡа булышлыҡ иткәне өсөн рәхмәт әйтте. – Ҡунаҡсыллыҡ, ветерандарыбыҙҙы йылы ҡабул итеүегеҙ өсөн рәхмәт. Беҙ программабыҙҙы артабан да үҫтерәсәкбеҙ. Өфө менән Минск араһында авиарейстар һанын арттырыу тураһында уйлайбыҙ, – тип билдәләне Радий Хәбиров. Үҙ сиратында Роман Головченко Башҡортостан туристарынан ҡәнәғәт йылмайыуҙарҙы һәм ыңғай баһалар ишетеү бик оҡшатыуын һыҙыҡ өҫтөнә алды. Фотолар һәм мәғлүмәт сығанағы: glavarb.ru.