Мәләүез ҡалаһында йәшәгән Рәзилә Ҡотлогилдина “Башҡортостан” гәзитенән бер ваҡытта ла айырылмай – һәр саҡ яҙыла, “Гәзиткә яҙыл да, бүләк от!” конкурсында ҡатнаша, шулай уҡ беҙҙең әүҙем авторҙарыбыҙҙың береһе булып тора. Рәзилә Фәтих ҡыҙы сығышы менән Күгәрсен районының Бикес ауылынан. Инде оҙаҡ йылдар Мәләүез ҡалаһында йәшәй, Мөхәмәтша Буранғолов исемендәге китапханала башҡорт теленән әйҙәүсе белгес булып эшләй. – Мөхәмәтша Буранғоловтың рухи аманатын халҡыбыҙға еткереү өҫтөндә эшләйбеҙ. Гәзит-журналдарҙы күп алдырам, ете-һигеҙ дана булып китә. Китапханабыҙҙың әүҙем уҡыусыларына ла уларҙы уҡырға тәҡдим итәбеҙ. Республикабыҙҙың төп баҫмаһы булған “Башҡортостан” гәзитенән айырылған юҡ. Әсәйем: “Ҙур гәзит түрҙә торһон. Һәр береһен кеше яҙған бит”, – тип уны түргә – ике тәҙрә араһына элеп ҡуя ине. Етмәһә, йыртылмаһын тип ипләп кенә осонан ғына еп менән эләктереп ҡуя. Әсәйемә күршеләр гәзит уҡырға һәм унан уҡытырға, хат яҙырға һәм уны яҙҙырырға инә торғайны. Миңлеғужа бабай Ҡотлоғилдан беҙгә инеп: “Әйҙә, Рәшиҙә ҡарындаш, передауайыңды уҡы әле”, – тип әйтә ине. “Башҡортостан” гәзитенең бүләк оттороу сараһында бер нисә йыл рәттән ҡатнаштым. Бүләк отоп торам, рәхмәт, – тине Рәзилә Фәтих ҡыҙы. Хөрмәтле дуҫтар, әле икенсе ярты йыллыҡҡа “Башҡортостан” гәзитенә яҙылыу башланды. Һеҙ ҙә ҡатнашығыҙ, бүләк отоғоҙ! Онотмағыҙ: маҡсатлы кеше һәр саҡ ниәтенә өлгәшә. Рәмилә МУСИНА фотоһы.