Кемдер ауа, кемдер яралана. Стройҙан сыҡҡандар араһында полк медпункты начальнигы ары йүгерә, бире шыуыша, берәмләп-бөртөкләп иңендә күтәреп, һөйрәп булһа ла атаканан ышыҡҡа алып бара, яраларҙы бәйләй, тылға оҙата. Әжәл “салғыһы” үҙенә бына ҡағылам-бына ҡағылам тип үтеп китә янынан, әммә “Өфө” быға иғтибар ҙа итмәй, ярһымай ҙа, өтөләнмәй ҙә, тыныс, ләкин етеҙ итеп, еренә еткереп бурысын, хәрби бурысын үтәй! Әйтерһең дә, ул ут эсендә түгел, әйтерһең дә, ул эшендә, йылы бүлмәлә кемгәлер ашыҡмай ғына операция яһай. Өфөнөң 13-сө ҡала дауаханаһы хирургы Рөстәм Минһажев 2022 йылда мобилизациялау буйынса фронтҡа йүнәлә, табипмын, бында кәрәкмен, “бронь бирегеҙ” тип дәғүәләшеп тә йөрөмәй ул, саҡырыу килгәс тә, йөрәк ҡушыуы буйынса илен һаҡларға баҫа һәм бына инде йылдан ашыу ул ысын мәғәнәлә үлем менән ғүмер араһында – яуҙаштарының ғүмерен һаҡлап алып ҡала, әжәл ҡуйынынан тартып алған саҡтары ла һирәк түгелдер. 500-ҙән ашыу яуҙашының ғүмерен һаҡлап ҡалған ул ошо ваҡыт арауығында! Ә шул уҡ хәрби операция зонаһында күпме ябай граждандарҙың ғүмерен оҙайтҡан икән, күпме медицина ярҙамы күрһәткән – быларын да иҫәпләп бөтөрлөк түгелдер!.. Шулай ҙа, һүҙҙе был ваҡиғаларға бер ни тиклем алдараҡ булған күренештәрҙән башлау ғәҙелерәктер. 2020 йыл... Донъяны ковид сире ялмап алды. Кешелек ошо афәт менән көрәшкәндә төп ауырлыҡ һис шикһеҙ табиптарҙың иңенә өйөлдө һәм был мәлдә лә Рөстәм Радик улы ул саҡтағы “уттың” эсендә ине. Ул шәхсән рәүештә баш ҡала дауаханаларының береһендә ковид-хәстәхана булдырыуҙа ҡатнашып, сир йоҡтороуҙан ҡурҡмайынса кешеләрҙе, шул иҫәптән зарарланған, әммә хирург ярҙамы кәрәк булғандарҙы дауалай. Әйткәндәй, ошо ҡыйыу эштәре өсөн лайыҡлы рәүештә Лука Крымский миҙалы менән бүләкләнгән. Башҡортостан Башлығы Маҡтау грамотаһы ла бар уның наградалар сылбырында – был иһә Донецк Халыҡ Республикаһында табип-ирекмән булараҡ башҡарған эштәре өсөн юғары баһа. Награда тигәндән, өлкән лейтенант фронттағы тәүге наградаһын әле 2023 йылдың апрелендә ала – уға “Һәләк була яҙғандарҙы ҡотҡарған өсөн” миҙалы тапшырыла. Был хаҡта күптән түгел Башҡортостан Башлығы Хакимиәте етәксеһе Максим Забелин белдерҙе. Миҙалдар бында батырҙың абруйын баһалау өсөн генә телгә алынманы, әлбиттә. Кешеләрҙең, Кешелектең ғазаптарын, ауырлыҡтарын үҙ күҙҙәре менән күргән, Донецк халҡының зарын, ковид менән сирләп йәшәү өсөн көрәшкән пациенттарҙың хәлен йөрәге аша тойоп операциялар яһаған хирург Ватаны саҡырғас та башҡа төрлө ҡарар ҡабул итмәҫ тә ине! Иң мөһиме: имен-аман көйө, Еңеү менән әйләнеп ҡайтһын ул меңәрләгән яуҙаштары менән, хеҙмәт иткән дауаханаһында тыныс шарттарҙа йәнә үҙ йүнәлеше – лапароскопия буйынса тыныс шарттарҙа дауалаһын!.. Ә әлегә... Дошман тынмай, пулялар һыҙғыра. “Өфө” әжәл “салғыһына” иғтибар ҙа итмәй, яраларҙы бәйләй...