Егеттәрҙең ныҡлығы илгә ауыр саҡта һынала. Тап ошо мәлдә улар йәнтөйәктәренең ҡалҡанына әүерелә. Бөгөнгө мәҡәләбеҙ геройы, махсус хәрби операцияла контракт буйынса хеҙмәт итеүсе Миәкә районы егете тураһында ла ошо һүҙҙәрҙе әйтергә мөмкин. Яугирҙең ата - әсәһе Розалия менән Рифғәт Зиязетдиновтар менән әңгәмәбеҙ күбеһенсә уларҙың улдары тураһында барҙы. – “Урал батыр тоҡомдары, Һомайҙың нәҫелдәре” конкурсы тап беҙҙең улыбыҙ һымаҡтар өсөндөр. ”Булыр бала биләүҙән” тигән һымаҡ башланғыс класта уҡ улыбыҙ тик “биш” ле һәм “дүрт” ле билдәләренә уҡыны. Малай булһа ла тәртипле, ипле булып үҫте. Хатта яҙыуы ла таҙа, матур булды. Китап, дәфтәрҙәрен дә бөхтә итеп, ҡәҙерләп йөрөттө. Мәктәпкә барһаҡ, уҡытыусыһы Зәлифә Янышева һәр ваҡыт маҡтау һүҙҙәре менән ҡаршы алды. Яҡшы уҡып ҡына ҡалманы, спортты ла үҙ итте, шәп йүгерҙе, футболды яратты. Мәктәптә уҙғарылған ярыштарҙа, олимпиадаларҙа алдынғы урындар яулап беҙҙе шатландырҙы. Яҡшы уҡығаны өсөн заманында республика Президенты шыршыһына ла барып ҡайтты. Өйҙә лә бер эштән дә ҡурҡып торманы. Атаһына йорт-ихата тирәһендә, мал ҡарашыуҙа ярҙам итһә,кәрәк саҡта миңә һауыт-һабаһын йыуышты, бешеренергә лә булышты, – тип ихлас һөйләп алып китте улы тураһында Розалия ханым. Ғорурланмаҫлыҡмы ни!? Балаңдың уңыштарынан да ҙурыраҡ бәхет бармы икән һуң? Бала саҡтан һалынған көслө рух артабанғы тормошонда ла төплө ҡарарҙар ҡабул итергә ярҙам итә. Мәктәп йылдары һиҙелмәй ҙә үтеп китә. Сығарылыш имтихандарында ла һынатмай егет. Медицина тикшеренеүе үткән саҡта уға Һарытау радиация, химик, биологик һаҡлау институтына барырға кәңәш итәләр һәм ул үҙенең көсөн һынап ҡарай. Яңы мәктәпте тамамлаған егет бер белмәгән яҡтарға сығып китһә лә, юғалып ҡалмай. Тиҙҙән ата-әсәһе улдарынан: ”Имтихандарҙы уңышлы тапшырҙым. Уҡырға индем” тигән хәбәр ала. Ул ваҡытта телефондар булмағанда төп бәйләнеш сараһы хат була. Был уҡыу йортонда ла үҙен лайыҡлы күрһәтә белә. Биш йылдан уны ҡыҙыл дипломға һәм алтын миҙалға тамамлай. Был бәхетле көн дә әлегеләй күҙ алдында ата-әсәһенең . – Һарытауға сығарылыш тантанаһына барып, шатланып ҡайттыҡ. Институтҡа ингән ерҙә үк улыбыҙҙың фотоһын һәм исем-фамилияһын күреп, ғорурланыу тойғолары уянды. Силәбе яҡтарында практикаһын да матур үтеп ҡайтҡайны. Тормошта өлгәшкән уңыштары өсөн улыбыҙ йыш ҡына уҡытыусыларына рәхмәтле булыуын белдерә, улар тураһында онотҡаны юҡ. Мәктәптә төрлө фәндәрҙән белем биреүсе Зәлиә Хәбибуллина, Әнүәр Баһауетдинов, Рәзилә Канзетдинова, Минегөл Таһирова һәм Харис Диниевҡа рәхмәт әйтеп хат та яҙҙы, – тип һөйләй Розалия һәм Рифғәт Зиязетдиновтар. Ысын ир-егеттәрҙе ауырлыҡтар ҡурҡытмай. Махсус хәрби операция башланыу менән Миәкә яугире үҙенең хәрби бурысын үтәргә ошо биләмәгә китә. –Хәрби булыр өсөн ауырлыҡтарға бирешмәҫкә, маҡсатлы булырға кәрәк. Ихтыяр көсөңдөң ныҡ булыуы ла мөһим. Махсус хәрби операцияағы егеттәр менән бер - беребеҙгә терәк булып хеҙмәт итәбеҙ, – ти яугир. Батыр егет махсус хәрби операцияла ла үҙен күрһәтеп өлгөргән. Беренсе һәм икенсе дәрәжә “Хәрби Ҡаһарманлыҡ өсөн” һәм “Хәрби батырлығы өсөн” һәм башҡа миҙалдары бар . -Йәш быуынға әйтер теләктәрем: спорт менән шөғөлләнһендәр, һаулыҡтарын йәш саҡтан уҡ һаҡлаһындар, эске менән мауыҡмаһындар. Ата-әсәйҙәрен хөрмәт итһендәр, – тигән теләктәре йәштәр өсөн фәһемле. Яугирҙең яҡындарына хөрмәте, ихтирамы уның булмышында, холҡонда. Ата-әсәһенә лә ул рәхмәт әйтергә онотманы: –Атайым менән әсәйем – минең өсөн һәр ваҡыт ныҡлы ҡанат. Уларҙың иҫән-имен булыуҙарын теләйем, – тине. Көслө рухлы, аҡыллы, ҡурҡыу белмәҫ ул үҫтергән ата-әсәйҙең үҙҙәренең алдында ла баш эйерлек. Бындай яугирҙәр ата-әсә өсөн генә түгел республика, ил өсөн ғорурлыҡ. Иң мөһиме – тиҙерәк тыныслыҡ урынлашһын һәм батырҙарыбыҙ тыуған яҡтарына иҫән-имен әйләнеп ҡайтһын. Көткән яҡындары хаҡына! Хәтерегеҙгә төшөрәбеҙ, контракт төҙөү мәсьәләре буйынса республика халҡы берҙәм 177 белешмә номеры, Ситуация үҙәгенең 122 йәки (347) 218-19-19 телефондары аша, “Минең документтарым” күп функциялы үҙәгенең яҡындағы офисына мөрәжәғәт итә ала. Фото: Зиязетдиновтар ғаиләһе архивынан.