Սերգեյ Ավակյանցը կգլխավորի ՌԴ Ազգային հետազոտական ​​համալսարանի ինստիտուտներից մեկը

Հայազգի ռուս զինվորական Սերգեյ Ավակյանցը դարձել է Ազգային հետազոտական ​​համալսարանի տնտեսագիտության բարձրագույն դպրոցի Համաշխարհային ռազմական տնտեսության և ռազմավարության ինստիտուտի տնօրենը, հայտնում է ռուսական համալսարանի մամուլի ծառայությունը։ «Յուրաքանչյուր զինվորականի սովորեցնում են հարմարվել ցանկացած, նույնիսկ ամենածայրահեղ իրավիճակին։ Համալսարանը բացառապես բարենպաստ միջավայր է ստեղծել աշխատանքի համար, ուստի հարմարվելը հեշտ է ընթանում, ես այս առումով խնդիրներ չունեմ»,- համալսարանի լրատվական ծառայությանը փոխանցել է Ավակյանցը։ Ինստիտուտը կգործի Համաշխարհային տնտեսության և համաշխարհային քաղաքականության ֆակուլտետում և կուսումնասիրի միջուկային զենքի դերը՝ որպես զսպման գործիք, ինչպես նաև կվերլուծի ռազմաքաղաքական իրավիճակը Կենտրոնական Ասիայում։ Ավակյանցը ծնվել է 1958 թվականին՝ Երևանում։ 2012-2023 թվականներին եղել է Ռուսաստանի խաղաղօվկիանոսյան նավատորմի հրամանատար։

Լրացուցիչ տեղեկությունների համար այցելեք կայք: https://armeniatoday.news/hy/world-2/710162/
© 2024 Armenia Today