Бөгөн Республика йортонда Башҡортостан Башлығы Радий Хәбиров Рәсәй Президенты Хакимиәте етәксеһе урынбаҫары Магомедсалам Магомедов менән осрашты. Ул республикаға Башҡортостандың беренсе Президенты Мортаза Ғөбәйҙулла улы Рәхимовтың тыуыуына 90 йыл тулыуға арналған тантаналы сараларҙа ҡатнашыу өсөн килгән. Осрашыуҙа төбәктә социаль өлкәне үҫтереү һәм милләт-ара мөнәсәбәттәрҙе нығытыу мәсьәләләре тикшерелде. – Һеҙҙе, Магомедсалам Магомедалиевич, Өфөлә сәләмләүебеҙгә шатбыҙ. Башҡортостандың беренсе Президентын хөрмәт иткәнегеҙ, республикаға ҡарата ихтирамығыҙ өсөн рәхмәт, – тине Радий Хәбиров. – Күп милләтле һәм конфессия-ара берҙәмлек күҙлегенән ҡарағанда, Башҡортостан – үҙенсәлекле төбәк. Быға тиклем һеҙ Дағстанға – Рәсәйҙең күп милләтле республикаларының береһенә етәкселек иттегеҙ. Башҡортостанда ла шул уҡ матурлыҡ һәм күп төрлөлөк. Республика халҡы структураһы башҡорттарҙан, рустарҙан, татарҙарҙан тора. Беҙҙә шулай уҡ мордвалар, мариҙар, удмурттар, сыуаштар йәшәй. Һәм һәр ҙур милләт төркөмөнә ҡарата беҙ телдәрҙе һәм мәҙәниәттәрҙе һаҡлау сәйәсәтен үткәрәбеҙ. Беҙҙә Башҡортостан халыҡтарының милли-мәҙәни автономиялары булдырылған, полилингваль гимназиялар проекты сиктәрендә уларҙың телдәрен төплө өйрәнеү буйынса ҙур проектты бойомға ашырабыҙ. Дөйөм алғанда ижтимағи-сәйәси, конфессия-ара һәм милләт-ара хәл халыҡтың юғары берҙәмлеге, ныҡлы союзы менән характерлана. Рәсәй Президенты Хакимиәте етәксеһе урынбаҫары Магомедсалам Магомедов Башҡортостанда дәүләт милли сәйәсәтен тормошҡа ашырыу буйынса планлы эш алып барылыуын билдәләне. – Башҡортостан Республикаһына һәр саҡ ҙур теләк менән киләм. Иҡтисад һәм социаль өлкәне үҫтереү йәһәтенән был алдынғы, ҡеүәтле республикаларҙың береһе тип иҫәпләйем, – тине Магомедсалам Магомедов. – Һеҙ дәүләт милли сәйәсәтен тормошҡа ашырыуҙа күп эш башҡараһығыҙ. Ил Президенты Владимир Путиндың ҡушыуы буйынса төбәк етәкселеге Дәүләт милли сәйәсәте стратегияһын тормошҡа ашырыу планын үтәй. Республикала милләт-ара һәм конфессия-ара татыулыҡты нығытыу мәсьәләләренә ҙур иғтибар бүленә. Был турала объектив һандар һөйләй. Республика халҡының күпселеге – халыҡтың 90 процентҡа яҡыны - төрлө милләт кешеләре араһындағы мөнәсәбәттәрҙе нейтраль, изгелекле тип иҫәпләй – был илдә иң яҡшы күрһәткестәрҙең береһе. Республикала йәшәүселәр бер-береһенә иғтибар, хәстәрлек тоя һәм ихтирам менән ҡарай. Был төбәктең идара итеү командаһының Башҡортостан халыҡтарының мәҙәниәтен һәм традицияларын һаҡлауға индергән өлөшө хаҡында һөйләй. Осрашыу аҙағында Рәсәй Президенты Хакимиәте етәксеһе урынбаҫары Магомедсалам Магомедов республиканы экстремизм күренештәренән һаҡлауҙа ярҙам күрһәтеүен белдерҙе. – Протест сығыш яһауҙың берҙән-бер осраҡтары, атап әйткәндә, Баймаҡта үткән рөхсәтһеҙ акция системалы түгел, тип иҫәпләйем. Бындай кешеләрҙең республикала киң хуплау алыуы мөмкин тип уйламайым. Башҡортостан халҡының күбеһе бындай ғәмәлдәрҙе ғәйепләүенә шигем юҡ. Изге ниәттәр битлеген күрһәтеп, милләт-ара татыулыҡты тарҡатырға маташҡан, сепаратистик идеяларҙы яҡтыртҡан экстремистик активистарҙың ғәмәлдәре ҡаты баһа алырға тейеш тип иҫәпләйем. Радий Фәрит улы, һеҙҙең башланғысты хуплайым. Халыҡ менән мәғлүмәти, аңлатыу эштәрен алып барыу мөһим, һәм һеҙ быны эшләйһегеҙ, – тине Магомедсалам Магомедов. – Рәсәй Президенты Хакимиәтендә бергә эшләгән саҡтағы шәхси мөнәсәбәттәребеҙҙе бик ҡәҙерләйем һәм хөрмәт итәм. Әле һеҙ бөйөк илебеҙҙең ҙур субъектына етәкселек итәһегеҙ. Һеҙгә һәм Башҡортостан халҡына уңыштар,тыныслыҡ теләйем. Аҙаҡ журналистар менән аралашҡанда Башҡортостан Башлығы Радий Хәбиров һәм Рәсәй Президенты Хакимиәте етәксеһе урынбаҫары Магомедсалам Магомедов төбәктә милләт-ара һәм конфессия-ара мөнәсәбәттәрҙе нығытыу буйынса саралар хаҡында һөйләне. Магомедсалам Магомедов ни өсөн халыҡтың 90 проценты республикала милләт-ара мөнәсәбәттәрҙе ыңғай тип баһалауына үҙ фекерен әйтте. – Был – илдә иң яҡшы күрһәткестәрҙең береһе. Ул милләт-ара йәки конфессия-ара ыҙғыш өсөн етди тәүшарттар һәм сәбәптәр юҡлығы хаҡында һөйләй. Был - әлбиттә, Башҡортостан биләмәһендә күп милләтле халыҡтың тарихи йолалары һөҙөмтәһе. Был - шулай уҡ республика етәкселеге – төбәк Башлығы Радий Фәрит улы Хәбировтың, уның командаһының республикала милләт-ара һәм конфессия-ара берҙәмлекте һәм татыулыҡты нығытыу буйынса әүҙем эшмәкәрлеге һөҙөмтәһе. Был - етди системалы эш. Кисә Өфөгә килгәс, Радий Фәрит улының киң даирә кешеләр, төбәк үҫешенә төрлө ҡарашлы йәмәғәтселәр менән осрашыуын күрҙем. Улар менән дә диалог алып барырға кәрәк. Шул уҡ ваҡытта был сепаратизм һәм экстремизм идеялары менән һуғарылған, санкцияланмаған акциялар уҙғарған кешеләрҙең республика халҡында киң хуплау тапмауына инанам. Бында йәшәүселәрҙең күпселеге киләсәген бөйөк илебеҙҙең бик күп халыҡтары менән бергә күрә. Ул ысынлап та объектив тенденцияларҙы һәм дөйөм алғанда йәмғиәттең кәйефен күрһәтә. Бөтә ил ошо хаҡта һөйләй, Башҡортостан халҡы махсус хәрби операция барышында ҡыйыулыҡ һәм батырлыҡ күрһәтә, тип билдәләне Владимир Владимирович Путин. Ә республика фронт линияһында булғандарға һәм уларҙың ғаиләләренә ҙур гуманитар ярҙам күрһәтә. Был - бик мөһим миссия. – Радий Фәрит улы, һеҙ милли-мәҙәни берекмәләр вәкилдәре менән осрашыуҙар үткәрә башланығыҙ. Кисә Бөтә донъя башҡорттары ҡоролтайы активистары менән һөйләшеү үтте. Бындай аралашыу һеҙҙең өсөн ни тиклем мөһим, һәм башҡа берләшмәләр менән дә бындай аралашыу планлаштырыламы? – тип һоранылар Радий Фәрит улынан. – Һис шикһеҙ, бындай форматтар бик мөһим, сөнки милли-мәҙәни автономиялар йәки шул уҡ Бөтә донъя башҡорттары ҡоролтайы милләтте сағылдыра. Улар, ысынлап та, төрлө мәсьәләләр буйынса халыҡтың фекерен белдерә. Уңышлы башҡарған бурыстар бихисап. Күп йылдар дауамында йыйылған мәсьәләләр бар, һәм беҙ уларҙы һөҙөмтәле хәл итеү өсөн саралар күрәбеҙ. Бөтә донъя башҡорттары ҡоролтайы вәкилдәре менән осрашыу бик ҡыҙыҡлы булды. Беҙ шулай уҡ Рустар соборы, Сыуаштар канашы, Татарҙар конгресы һәм башҡа милли мәҙәни автономиялар менән осрашыуҙар үткәрәсәкбеҙ. Дөйөм алғанда был осрашыуҙар экстраординар характерҙа түгел. Беҙ көнүҙәк мәсьәләләрҙе даими тикшерәбеҙ. Фото: Башҡортостан Башлығы сайты.