Благовещен районының Богородский ауыл биләмәһе хакимиәте башлығы Людмила Әхмәрова улы менән МХО ҡатнашыусылары өсөн тактик беләҙектәр үрә. Был беләҙек "паракорд" тип аталған бик ныҡ бауҙан махсус ысул менән үрелә. Ул секунд эсендә һүрелә һәм яугирҙең ҡулында оҙонлоғо 5 метр самаһы булған ныҡлы бауға әйләнә. Бындай беләҙектәр ни өсөн кәрәк? Беләҙек – тактик, медицина һәм хужалыҡ маҡсаттарында ҡулланылған паракордты һаҡлауҙың компакт һәм уңайлы формаһы. Уның ярҙамында, мәҫәлән, дошмандың ҡулдарын бәйләргә, яралыны сығарырға, йөктө нығытырға, йыртылған бауҙарҙы алмаштырырға мөмкин. Паракордтың эске сүстәре айырым-айырым ныҡлы еп булараҡ та ҡулланыла. Тактик беләҙектең мәғәнәһе шунда: яугир уны һәр ваҡыт ҡулында йәки карабинға беркетелгән килеш ҡул осонда йөрөтә. Был осраҡта ул уны көтөлмәгән хәлдә файҙалана ала. Мәҫәлән, әгәр ул засадала ҡалһа, ҡайҙалыр ҡолап төшһә, иптәштәре йәки рюкзагы булмаһа, яңғыҙ ҡалһа. Әлегә бер нисә беләҙек бәйләгәндәр. Әгәр күберәк ижтыяж булһа, күләмде арттырырға планлаштыралар. Барлыҡ беләҙектәр яҡын арала МХО зонаһына ебәреләсәк. Беләҙек һалдаттарға уларҙы хәстәрләүҙәрен, яратыуҙарын һәм өйҙә көтөүҙәрен иҫкә төшөрөп торасаҡ. Сығанаҡ: vk.com/wall-147604036_33184