Халҡына арналған ғүмер

Бөгөн Башҡортостандың беренсе Президенты Мортаза Ғөбәйҙулла улы Рәхимовтың тыуыуына 90 йыл тулыуға арнап республиканың Фәндәр академияһы бинаһында “Халыҡҡа арналған ғүмер” тип аталған Бөтә Рәсәй фәнни-ғәмәли конференция ойошторолдо. Билдәле булыуынса, уға иртәгә, 7 февралдә 90 йәш тулған булыр ине. Конференция ике көн дауам итә – 6 һәм 9 февралдә. 9 февралдә ул Өфөнөң алдынғы уҡыу йорттары Рәми Ғарипов исемендәге 1-се һанлы республика башҡорт гимназия-интернаты һәм “Смарт” 2-се республика полилингваль күп профилле гимназияһында үтәсәк. Бында балалар өсөн ғилми секциялар ойоштороласаҡ. Бөгөн иһә Фәндәр академияһында ғалимдар, билдәле йәмәғәтселәр, дәүләт власы вәкилдәре, йәштәр йыйылды. Пленар ултырышты Фәндәр академияһының вице-президенты, иҡтисад фәндәре докторы, профессор Александр Дегтярев асты һәм уны алып барҙы. – Бөгөн беҙ аҡыллы аҡһаҡал, көслө сәйәсмән Мортаза Рәхимовҡа араналған конференцияла йыйылдыҡ. Ул республикаға еңел булмаған 90-сы йылдарҙа идара итте. Тап шул йылдарҙа Башҡортостан юғары темптар менән үҫеште. Шул ваҡыттағы уның эшмәкәрлеге һөҙөмтәһе булып бөгөн республикала йөҙҙән ашыу халыҡтың дуҫлыҡта һәм хөрмәттә йәшәүе, беҙҙең бик күп күрһәткестәр буйынса алдынғы төбәк булыуы тора, – тине ул. – Мортаза Ғөбәйҙулла улы үҙе ауылда тыуған кеше булараҡ ябай ауыл халҡы менән уртаҡ тел тапты. Нефть заводтарында эшләгән кеше булараҡ сәнәғәтселәр менән дә бер тулҡында ине. Шуға күрә уға бөтәһе лә ышанды һәм яратты. Ҡунаҡтарҙы Башҡортостан Фәндәр академияһы президенты Камил Рамазанов сәләмләне. Уның әйтеүенсә, был сара Фәндәр академияһы бинаһында осраҡлы ғына үткәрелмәй. Тап Мортаза Ғөбәйҙулла улы башланғысы менән был академияға нигеҙ һалына һәм бөгөн ул уңышлы эшләп килә. Әлеге ваҡытта ни бары дүрт милли республиканың ғына үҙ Фәндәр академияһы бар. Төп доклад менән Дәүләт Йыйылышы – Ҡоролтай Рәйесе урынбаҫары, иҡтисад фәндәре докторы Илшат Тажетдинов, ғалимдар, уның менән бергә эшләгән кешеләр сығыш яһаны. Улар беренсе президенттың төрлө тармаҡтарҙарғы эшмәкәрлегенә байҡау яһаны һәм баһа бирҙе. Төштән һуң эш секциялар ултырышында дауам итте. Әйтергә кәрәк, был конференция Мортаза Рәхимовтың исемен мәңгеләштереү һәм уның тыуыуына 90 йыл тулыуға арналған сараларҙың бер өлөшө генә булып тора. Улар артабан да дауам итәсәк. Автор фотоһы.