Бөрйән районының Яңы Собханғол ауылы районда иң ҙур ауылдарҙың береһе һанала, сөнки һуңғы йылдарҙа ауыл бик йылдам үҫешә, элекке колхоз баҫыуҙары ерҙәренә күп балалы ғаиләләргә тәғәйенләнгән проект буйынса йәш ғаиләләр күсеп, донъя ҡора. Йәшәү өсөн бөтә шарттар ҙа булдырылған бында. Әлбиттә, газы ла, һыуы ла үткән, асфальт юлы ла, ике ҡатлы яңы мәктәбе лә булған ауылдың башҡа мәсьәләләре лә юҡ түгел. Шуға ла улар быйыл "Урындағы башланғыстарға булышлыҡ итеү программаһы"нда ҡатнашып, көстәрен һынап ҡарарға ниәт иткән. Ошо уңайҙан ауылда инициатив төркөм төҙөлгән, йыйылыш үткәрелеп халыҡтан анкеталарға яуаптар алынған, аныҡ маҡсаттар һәм башҡараһы эштәр билдәләнгән. Йыйылыш һәм анкеталар һөҙөмтәһенә ҡарап, ауылда спорт һәм балалар майҙансығы булдырыу кәрәк, тип хәл ителгән. Әлбиттә, был осраҡта инде, ауыл халҡы бик әүҙем, төрлө сараларҙа, төрлө йыйылыштарҙа дәррәү ҡатнаша. Шуны ла әйтеп үтергә кәрәк, ауыл мәктәбе лә был сараларҙың уртаһында ҡайнай. Күптән түгел Яңы Собханғол урта мәктәбендә “Ҡышҡы ғаилә уйындары - 2024” бәйгеһе булып уҙҙы. Ярыш бик ҡыҙыҡлы үтте. “Быйма кейеп, сәкән һуғыу”, “Ҡулса менән йүгереү”, “Теннис тубын сәкән менән йөрөтөү” кеүек һәм башҡа уйындарҙа ауыл халҡы ихлас ҡатнашты. Һәм, ярыш булғас, уның еңеүсеһе лә була тигәндәй, Муллағоловтар ғаиләһе Гран-при яуланы. 1-се урынға - Кинйәбаевтар , 2-се урынға - Бабаевтар, 3-сө урынға Әхтәмовтар ғаиләһе сыҡты. Ярышта ҡатнашыусыларға диплом һәм иҫтәлекле бүләктәр тапшырылды. Ә Муллағоловтар ғаиләһенә район кимәлендәге “Ҡышҡы ғаилә яраштыры”нда уңыштар юлдаш булһын! Шуны ла билдәләп үтергә кәрәк: был ауылда элек-электән дәртле, берҙәм халыҡ йәшәй. Бөгөн инде улар үҙҙәренең 25 улын махсус хәрби операциянан иҫән-һау көтөп алыуҙарына доға ҡылып, ауыл мәсетенә бергәләп йома намаҙына йөрөй, ошо тыныс тормошобоҙҙоң ҡәҙерен белеп, ауыл эсендә “Ҡышҡы Нардуған”, “Һуғым ашы”, “Яңы йыл мажаралары”, “Күңел йырҙары кисәһе”, “80-90 йылдар стилендәге дискотека”, Ленинград ҡалаһын фашист ҡамауынан тулыһынса азат итеүгә 80 йыл тулған көнгә арнап “Блокада икмәге”, “ 900 көн...” исемле күргәҙмә, сәләмәт тормошто яҡлаған скандинав таяғы менән йөрөү һәм башҡа төрлө сараларҙа ихлас ҡатнаша. Яңы Собханғол ауылының киләсәге яҡты, һәм ул, иң мөһиме, ышаныслы ҡулдарҙа икәнен күрәбеҙ һәм был ауыл халҡына тик уңыштар теләйбеҙ! Фотолар: Иҫке Собханғол ауыл советының матбуғат хеҙмәтенән.