Өфөлә Башҡортостандың беренсе Президенты Мортаза Рәхимов тураһындағы романдың аудиоверсияһын яҙҙырҙылар. Билдәле булыуынса, яҙыусы Ғәлим Хисамов был документаль романды бер йыл элек кенә киң даирә уҡыусыларға тәҡдим иткәйне. Аудиояҙма 7 февралдә билдәләнәсәк беренсе Президентыбыҙҙың 90 йыллығына арналған. Тексты Башҡортостандың халыҡ артисы, Мәжит Ғафури исемендәге башҡорт дәүләт академия драма театры актеры Илдар Ғүмәров уҡып яҙҙырған. “Башинформ” агентлығына радионың баш мөхәррире Миләүшә Йәғәфәрова хәбәр итеүенсә, романдың фрагменттары 5, 6 һәм 7 февралдә 20:15 сәғәттә радио эфирында яңғыраясаҡ. Аудиояҙманың төп өлөшө фондта һаҡланасаҡ. Фотолар: “Башинформ” агентлығынан.