Найти тему
Башҡортостан гәзите

Стәрлетамаҡ районында яңы туристик объект асылды

Бөгөн Хөкүмәттең аҙналыҡ оператив кәңәшмәһе барышында Башҡортостан Башлығы Радий Хәбиров видеобәйләнеш режимында Стәрлетамаҡ районында “Ҡарағайҙар” яңы туристик ял базаһын асыу тантанаһында ҡатнашты. Хәтерегеҙгә төшөрәбеҙ, 2023 йылда Башҡортостан модулле капиталь булмаған урынлаштырыу сараларын – ҡунаҡханалар, глэмпингтар, шулай уҡ башҡа тиҙ күтәрелеүсе конструкциялар булдырыу буйынса туристик инвестиция проекттарын субсидиялауға һайлап алыу еңеүселәре иҫәбенә инде. Республика 25 муниципалитетта 58 проектты бойомға ашырыу өсөн федераль бюджеттан 930,6 миллион һум алды. Проекттарҙың береһе – Стәрлетамаҡ районында Ольховка йылғаһы буйында “Ҡарағайҙар” ял базаһын төҙөү. Төркиәнән шәхси эшҡыуар Алтын Балы 7 миллион һум күләмендә федераль грант отҡан, ошондай уҡ күләмдә үҙенең аҡсаһын һалған һәм ете модулле йорттан глэмпинг төҙөгән. Турбаза етәксеһе Алтын Балы Башҡортостан Башлығы Радий Хәбировҡа проектты тормошҡа ашырыуҙа ярҙам күрһәткәне өсөн рәхмәт белдерҙе. Стәрлетамаҡ районы хакимиәте башлығы Рита Сәмиғуллина видеобәйләнеш аша яңы объектты асыу муниципалитеттың туристик йәлеп итеүсәнлеген күтәреүен билдәләне. – Тулы ҡеүәтенә ял итеү өсөн бында заманса модулле йорттар төҙөлгән, мангал зонаһы һәм беседкалар булдырылған. Турбаза етәкселеге балалар өсөн уйын майҙансығы төҙөргә һәм бәйләнеш зоопаркын асырға планлаштыра, –тип һөйләне Рита Сәмиғуллина. – Ғаилә йылында Стәрлетамаҡ районында ғаилә менән ял итеү өсөн тағы бер урын барлыҡҡа килеүе бик символик мәғәнәгә эйә. Башҡортостан Башлығы Радий Хәбиров эшҡыуарҙы инвестиция проектының уңышлы тормошҡа ашырылыуы менән ҡотланы һәм уңыштар теләне. Фото: Башҡортостан Башлығы сайты.