Ադրբեջանի ԱԳՆ-ն քննադատել է Հայաստանի վարչապետ Նիկոլ Փաշինյանի փետրվարի 15-ի հայտարարություններն այն մասին, որ Բաքուն մտադիր է պատերազմով վերցնել այն, ինչ չի կարող վերցնել բանակցությամբ և ադրբեջանական կողմը սահմանների սահմանազատման վերաբերյալ Հայաստանի առաջարկները չի ընդունում, տեղեկանում ենք ադրբեջանական ԶԼՄ-ներից։
Պաշտոնական Բաքուն փետրվարի 13-ի գնդակոծությունը, 4 հայ զինվորի սպանությունը և 1 հայ զինվորի վիրավորումը «պատասխան» է անվանել «փետրվարի 12-ին երկու երկրների միջև հայկական կողմից կայունության խախտմանը»։
ԱԳՆ-ն հայտնել է, որ Հայաստանի պաշտպանության նախարարությունը խոստացել է հետաքննություն անցկացնել ադրբեջանցի զինծառայողի վիրավորվելու վերաբերյալ, ինչպես նաև պարզաբանել, թե ինչի հիման վրա են Հայաստանի սահմանային դիրքերում տարբեր զորամասերին պատկանող վարձկանները ենթարկվում Պաշտպանության նախարարությանը
Գերատեսչությունը Փաշինյանի հայտարարություններն անկլավների և էքսկլավների մասին և Ադրբեջանի՝ 31 գյուղերի տարածքներ օկուպացնելու մասին հայտարարությունն անվանել է «քաղաքական շահարկում»։
Անդրադառնալով տարածքային ամբողջականությանը և սահմանազատման իրականացմանը՝ հիմնված 1991 թվականի սահմանների և Ալմա-Աթայի հռչակագրի վրա, Ադրբեջանի ԱԳՆ-ն նշել է, որ հայկական կողմը «պետք է բացատրի», թե ինչու վերջին 35 տարիներին «չի հարգում այդ քարտեզներն ու համաձայնագրերը, հրաժարվում է ընդունել խորհրդային քարտեզներում նշված սահմանները և օկուպացված ադրբեջանական տարածքները»։
«Եթե հայկական կողմն իսկապես շահագրգռված է խաղաղ գործընթացով, ապա պետք է հրաժարվի Ադրբեջանի տարածքային ամբողջականության և ինքնիշխանության նկատմամբ հավակնություններից»,- նշված է հայտարարության մեջ:
Նորություններին հետևեք մեր կայքում (https://armeniatoday.news/hy), ինչպես նաև Telegram-ում (https://t.me/armtodayarm) և YouTube-ում (https://www.youtube.com/channel/UCzt73kS8-2XS9q5cLubs3ww)