Туғыҙ балаһының туғыҙ яҡтан “атай” тип өндәшеүе – ниндәй ҙур бәхет!

Атай – ул донъя тотҡаһы, йәшәү маяғы. Бәләкәйҙән “атай” тип әйтер кешең булыуы – үҙе ниндәй ҙур ҡыуаныс. Ғафури районының Красноусол ауылында йәшәүсе һоҡланғыс ғаилә - Ләйсән менән Ринат Табулдиндар туғыҙ бала – ике ҡыҙ һәм ете ул үҫтерә. Ғаилә башлығы үҙе – ике, хужабикә өс йәшендә атайһыҙ ҡалып буй еткергәс, уларҙан да нығыраҡ атай кешенең ҡәҙерен белмәгән кеше юҡтыр һымаҡ. Хәҙер Табулдиндарҙың үҙҙәренең балаларының иң бәләкәсенә 10 йәш булһа, олоһона - 34 йәш. Алты ейән һәм бер ейәнсәргә өләсәй-олатай ҙа улар. Табулдиндар һәр балаһына юғары белем бирергә тырыша. Ҡайҙандыр әҙерҙе көтөп ятмай тырыш ғаилә, күпләп мал аҫрайҙар, йыл һайын 100-200-гә яҡын ҡош-ҡорт та тоталар. Урмартасылар ҙа. Ләйсән Ислам ҡыҙы тәүҙә Санкт-Петербург ҡалаһында медицина училищеһында белем ала, һуңынан Шолохов исемендәге Мәскәү гуманитар университетын ситтән тороп тамамлай. “Миләшкәй” балалар баҡсаһында логопед-педагог булып эшләй. Хәҙер инде Ләйсән Ислам ҡыҙы – һаулыҡ мөмкинлектәре сикләнгән баларлар өсөн ойошторолған “Өмөт нуры” фонды етәксеһе. Ринат Ғиниәт улы Стәрлетамаҡ троллейбус депоһында водитель булып эшләй. Уға тиклем “Башавтотранс” ойошмаһында хеҙмәт итә. Әйткәндәй, был йәмғиәт Ринат Табулдинға кер йыуыу машинаһын бүләк иткән. Уңған атайҙың намыҫлы хеҙмәте бихисап грамоталар менән баһаланған. Бынан тыш, ул – ҡул оҫтаһы, умартасы. Тағы ат ҡарарға, мал тоторға ярата. Бәләкәйҙән әсәһенә ярҙам итеп, тиҙ ҡул араһына ингән ир һәр эште нисек еренә еткереп атҡарырға ғына түгел, хеҙмәт, тормош ҡәҙерен белеп йәшәргә күнеккән. Өҫтәүенә, ниндәй генә эшкә тотонмаһын, сынъяһау, еренә еткереп атҡарырға тырыша. Ишле ғаиләнең бәхете лә ишле, ҡыҙғанысҡа ҡаршы, үҙҙәрен борсоған уй-проблемалары ла юҡ түгел. Әммә әсә һәм балалар ғаилә башлығының, ниндәй генә хәл-ваҡиғалар булмаһын, ҡәлғә кеүек ныҡ, әйткән һүҙен үтәр, биргән вәғәҙәһен бойомға ашырыр, ысын мәғәнәһендә ныҡлы терәк-таяныс булған атай, ир икәнлегенә күнегеп бөткәндәр. Тормошта ана шул тотороҡлолоҡҡа, ышанысҡа ҡай саҡ бер ни етмәй! Тиккә генәме ни уның ҡатыны – Ләйсән Ислам ҡыҙы – ире тураһында бары йылы һүҙҙәрен әйтә. Ә улар, ысынлап та, күңел түренән сыға. “Тормошобоҙҙа ниндәй генә хәлдәр булмаһын, Ринатымдың ышаныслы, ныҡлы ир, атай, олатай булыуы йөрәгемде йылыта”, - ти ул. Атанан күргән – уҡ юнған, тигәндәй, балалары ла тырыш, яҙмыш һынауҙарына бирешмәй, үҙҙәренә юл яра, белем тауҙарына ынтыла, ғаилә ҡора. Хатта туғандары ла был ғаиләгә ҡарап, йәшәү дәрте, үҙенә күрә бер өлгө ала. Табулдиндар әсәйҙәр йәиһә атайҙар, ғаиләләр араһында үткәрелгән төрлө сара-бәйгеләрҙә ихлас ҡатнаша, призлы урындар яулай. Әммә улар өсөн иң мөһиме: ғорурланып “атай”, “ирем” тип әйтер ғәзиз кешеләре бар. ...Тыштан барыһы ла ялтырап торған кеүек тойолһа ла, ғаиләне борсоған проблемалар байтаҡ. Ә уларҙы Табулдиндар, нисек кенә ҡыйын булмаһын, уртаға һалып һөйләшеп, аныҡ ҡарарға килеп һөйләшергә күнеккән. Ана шулай эш иткәндә, ғаилә караптары ла сайпылмай, бары алға ынтыла. “Башҡортостан” гәзитенең “Бәйләнештә” төркөмөндә барған конкурста Ғафури районынан ҡатнашҡан күп балалы, уңған, тырыш атай Ринат Табулдин өсөн тауышығыҙҙы, лайыҡтарығыҙҙы, йылы һүҙҙәрегеҙҙе йәлләмәһәгеҙ ине, дуҫтар! Фотолар: Табулдиндарҙың ғаилә архивынан.