Лиана менән Динар Биктимеровтарҙың ғаилә бизнесы – Башҡортостандың Тәтешле районында уңышлыларҙың береһе. Үҙҙәренең эшен улар 17 йыл элек, тыуған ауылында көндәлек кәрәк-яраҡтар һатылған ҙур булмаған магазин эшләй башлағас асҡан. Бөгөн эшҡыуарҙар балыҡ үрсетеү, умартасылыҡ, транспорт хеҙмәттәре күрһәтеү, ағас эшкәртеү менән шөғөлләнә, туризм өлкәһендә бизнестарын үҫтерә. 2023 йылда "Туризм һәм ҡунаҡсыллыҡ индустрияһы" милли проекты буйынса уларға дәүләт ярҙамы күрһәтелде, туризм өлкәһендә грантҡа лайыҡ булғандар. Алынған аҡсаға өс модулле кемпинг төҙөп бөткәндәр. “Косая степь” ял базаһында һәр саҡ йәнле. Йәй көнө бында балыҡ тоторға, урман буйлап йөрөргә, саф һауанан ләззәт алырға, бәшмәк йыйырға, дарыу үләндәре йыйырға мөмкин. Эшҡыуарҙар шулай уҡ ҡышҡы әүҙем ял хаҡында ла хәстәрлек күргән. Саңғы спортын үҙ итеүселәр өсөн прокат базаһы, яҡтыртылған трасса ойошторолған, күтәргес эшләй. “Әлеге ваҡытта пляжды төҙөкләндереп быуала ял итеү зонаһын булдырыу проекты һәм әүҙем ял өсөн кәрәкле ҡорамалдар һатып алыу өҫтөндә эшләйем”, - тип үҙ бизнесын үҫтереү пландары менән уртаҡлаша Динар Биктимеров. Биктимеровтарҙың ғаилә бизнесында тағы бер йүнәлеш бар – фермер хужалығы. Эшҡыуарҙар һөтсөлөк-тауар фермаһының буш торған бинаһын һатып алып, уны төҙөкләндереүгә аҡса йүнәлткән, һөтлө һыйыр малы һатып алған. Хужалыҡ 300 гектар ерҙе эшкәртә. Крәҫтиән-фермер хужалығы башлығының хужалыҡты үҫтереү буйынса проекты “Бәләкәй һәм урта эшҡыуарлыҡ, шәхси эшҡыуарлыҡ башланғысына булышлыҡ итеү” милли проекты сиктәрендә үткәрелгән “Эшҡыуарлыҡ сәғәте”ндә ҡаралды. Эшҡыуарҙарға дәүләт ярҙамы саралары буйынса консультация ярҙамы күрһәтелде, ә күп тә үтмәй хужалыҡ ғаилә фермаһын үҫтереүгә грант отҡан. Проект уңышлы ғәмәлгә ашырылған, аҡса мал иҫәбен арттырыуға һәм техника һатып алыуға йүнәлтелгән. Билдәле булыуынса, “Бәләкәй һәм урта эшҡыуарлыҡ, шәхси эшҡыуарлыҡ башланғысына булышлыҡ итеү” (национальный проект “Малое и среднее предпринимательство и поддержка индивидуальной предпринимательской инициативы”) милли проекты Рәсәй Президенты Владимир Путиндың май указы менән булдырылды. Фото: Тәтешле районы хакимиәте.