Өфө тамашасыһы Сибай артистарының ҡунаҡҡа килгәнен гел көтөп ала. Был юлы ла шулай булды. Х. Әхмәтов исемендәге Башҡорт дәүләт филармонияһының ҙур залы ул көндә “ысын” тауышҡа һыуһаған йыр-моң һөйөүселәр менән тулы ине. Кисәнең төп “геройы” –Башҡортостандың атҡаҙанған артисы Ғаяз Ғәйетбаев. “Йөрәк тулы йыр булғас” (“Ғаяздың мажаралары”) тамашаһы бик ҡыҙыҡлы сценарийға ҡоролғайны. Авторы – яҙыусы, шағирә Миләүшә Ҡаһарманова. Йөрәгендә моң йөрөткән әҙәм балаһы үҙ моңонан, күкрәк тултырып йыр һуҙырға көҫәгән күңеленән ҡаса аламы? Тырышып ҡарай, әлбиттә. Тик Моң уны ҡайҙа ла – сәхрәлә көтөү көткәндә лә, трактор йөрөткәндә лә эҙләп таба. Хатта шахтаға ла төшөп ҡарай геройыбыҙ, әммә йыр өсөн сиктәр юҡ, ул ер аҫтында ла урғылыр әмәлен таба!.. Сценарий авторы еңел юмор аша Ғаяз Ғәйетбаевтың сәхнәгә илткән юлын күрһәтә, тамашасы йыр тыңлап, талантлы Сибай бейеүселәренең сығыштарын ҡарап ҡына ҡалмай, тотош бер тамаша ҡыла. Шуғалыр ҙа концерт бер тында үтеп китте, тамашасылар хатта арып та өлгөрм