Радий Хәбиров: "Афғанстан ветерандары Ватан мәнфәғәттәрен яҡлауҙа ныҡлы тора"

15 февралдә «Башҡортостан» дәүләт концерт залында республика Башлығы Радий Хәбиров совет ғәскәрҙәрен Афғанстандан сығарыуға 35 йыл тулыуға арналған тантаналы йыйылышта сығыш яһаны. -Хөрмәтле иптәштәр! Хөрмәтле ветерандар, яугир-интернационалистар! Беҙ был залға мөһим датаны - совет ғәскәрҙәрен Афғанстандан сығарыуҙың 35 йыллығын билдәләү өсөн йыйылдыҡ. 1989 йылдың 15 февралендә хәрби частарыбыҙҙың һуңғы колонналары, техника Афғанстан еренән сыҡты һәм тыуған яҡтарына әйләнеп ҡайтты. Бөгөн беҙ интернациональ бурысын намыҫ менән үтәгән яугирҙәргә ихлас рәхмәт һүҙҙәрен еткерәбеҙ. Афғанстан - илебеҙ тарихында бик ҡатмарлы биттәрҙең береһе. Ул яугирҙәребеҙҙең батырлыҡ һәм ҡаһарманлыҡ символы. Ауыр шарттарҙа Ватан мәнфәғәттәрен яҡлап, хәрби хеҙмәткәрҙәр һәм граждан белгестәре юғары профессионализм, ныҡлыҡ һәм рух көсө күрһәтте, был илдә тыныс тормош булдырырға ярҙам итте. Афғанстан ветерандарына мөрәжәғәт итәм. Һеҙ - Бөйөк Ватан һуғышы йылдарында Тыуған илен һаҡлап ҡалған ҡаһарман ата-бабаларыбыҙҙың лайыҡлы вариҫтары. Һеҙҙең ҡыйыулығығыҙ, батырлығығыҙ, хәрби туғанлыҡҡа тоғролоғоғоҙ мәңгелеккә Ватаныбыҙҙың Дан китабына индерелгән. Республикабыҙҙан 3,5 меңдән ашыу яугир юғары дәүләт наградаларына лайыҡ булды. Улар араһында Рәсәй Геройҙары - Рафиҡ Рәшит улы Ихсанов, Риф Рәйес улы Сәхәбетдинов, Анатолий Александрович Сафронов, Венер Мансур улы Мөхәмәтгәрәев, Фәрүәт Абдулла улы Яҡупов. Афған һуғышы ветерандары республика һәм ил тормошонда әүҙем ҡатнаша, хәрби туғанлыҡҡа тоғро ҡала. Һеҙҙең күптәрегеҙ йәнә Тыуған илебеҙ сиктәрен һаҡлауға баҫырға ҡарар итте. Бөгөн махсус хәрби операция сиктәрендә улар, 35 йыл элек булғандағы кеүек, ҡыйыулыҡ һәм батырлыҡ күрһәтә. Ошо көндәрҙә Рәсәй Федерацияһы Президенты Владимир Путин Афған һуғышы ветераны, «Башҡортостан» полкының танк батальоны командиры Андрей Павлович Мигуновҡа Рәсәй Геройы исемен биреү тураһындағы указға ҡул ҡуйҙы. Бронетөркөмдө етәкләп, подполковник Мигунов дошмандың биләгән позицияларына ынтылышына юл ҡуймай һәм аяуһыҙ алышта батырҙарса һәләк була. Нәҡ ошондай геройҙар булып бөгөн йәштәребеҙҙе тәрбиәләйбеҙ. Афған һуғышында, Төньяҡ Кавказда, башҡа ҡыҙыу нөктәләрҙә һәләк булған яҡташтарыбыҙҙың исемдәре һәм батырлыҡтары махсус хәрби операция барышында һәр саҡ беҙҙең йөрәктәрҙә йәшәйәсәк. Афғанстандарҙың йәмәғәт ойошмалары - ветерандарға булышлыҡ итеү, йәштәр менән эшләүҙә беҙҙең тәүге ярҙамсыларыбыҙ. Рәсәй Афғанстан ветерандары союзы Башҡортостан ойошмаһының, республика Хәрби хәрәкәттәр ветерандары йәмәғәт ойошмаларының координация советының күп яҡлы эшмәкәрлеген билдәләп үтәм. Һеҙ хәрби-патриотик һәм спорт клубтарын ойоштороуҙа ҡатнашаһығыҙ, «Батырлыҡ дәрестәре»н үткәрәһегеҙ, яугир-интернационалистарҙың хоҡуҡтарын яҡлайһығыҙ. «Хәрби туғанлыҡ» Башҡортостан республика бүлексәһенең, Башҡортостан Хәрби хәрәкәттәр ветерандары союзының эшен юғары баһалайым. «Ветеран» төбәк йәмәғәт ойошмаһы инициативаһы буйынса һәм ойоштороу ҡатнашлығында «Хәрби бейеклек» патриотик йырҙар фестивалдәре уҙғарыла, республикабыҙҙың Афғанстан ветерандары тураһында «Шуравиның ҡайтыуы» документаль фильмы төшөрөлгән. Беҙҙән сикһеҙ хөрмәт һәм рәхмәт һүҙҙәрен ҡабул итегеҙ, ҡәҙерле яугир-интернационалистар. Беҙ һеҙҙең менән ғорурланабыҙ һәм ҡәҙерләйбеҙ! Барығыҙға ла ныҡлы һаулыҡ, ғаилә именлеге һәм тыныс күк йөҙө теләйем! Фото: БР Башлығы сайтынан.