15 февралдә Өфөнөң “Торатау” конгресс холында Башҡортостан Башлығы Радий Хәбиров Рәсәй фәндәр академияһының 300 йыллығына арналған тантаналы сараларҙа ҡатнашты. Конгресс-холдың фойеһында төбәк етәксеһе күргәҙмә экспозицияһын ҡараны. Бында Рәсәй фәндәр академияһының Өфө федераль тикшеренеү үҙәге составына ингән институттар үҙҙәренең ҡаҙаныштарын күрһәтте. Өфө федераль тикшеренеү үҙәге етәксеһе Василий Мартыненко һәм Үтә һығылмалы металдар проблемаһы институтының ғилми етәксеһе Радик Мөлөков биотехнологиялар, молекуляр диагностика һәм башҡа өлкәләге өҫтөнлөклө фәнни тикшеренеү проекттары тураһында һөйләне. Химия институты ғалимдары антиаритмика тигән медицина препаратын булдырыу өҫтөндә эшләйҙәр. Был уникаль препарат аритмиялы пациенттарҙың ғүмерен ҡотҡарасаҡ. Был тикшеренеүҙе академик Марат Юнысов башҡарған. Раил Кузеев исемендәге этнология тикшеренеүҙәре институты ғалимдары Өфө һәм Шишмә райондарында археологик ҡаҙыуҙар ваҡытында табылған уникаль табыштарҙы күрһәтте. Башҡортостан Башлығы төбәктең фән өлкәһенә республика тарафынан системалы ярҙам буласағын белдерҙе. - Беҙҙең маҡсат – инфраструктура булдырырға, мөһим проекттарҙы грант ярҙамы һәм финанслау менән тәьмин итергә, - тине Радий Хәбиров. – Шуға ла донъя кимәлендәге лабораториялар, алдынғы инженер мәктәптәре булдырыуға көсөбөҙҙө йүнәлтәбеҙ. Шул иҫәптән Евразия ғилми белем биреү үҙәгенең вуз-ара студенттар кампусын төҙөү кеүек күләмле проекттарҙы тормошҡа ашырабыҙ. Былар барыһы ла фәнде үҫтереүгә беҙҙең дөйөм өлөшөбөҙ. Тантаналы йыйылышта төбәк башлығы Радий Хәбиров республикабыҙҙың фәнни берләшмәһен Рәсәй фәндәр академияһының 300 йыллығы менән ҡотланы һәм Башҡортостандың дәүләт наградаларын тапшырҙы. Фото: Башҡортостан Башлығы сайтынан.