Башҡорт дәүләт опера һәм балет театрында Мостай Кәрим пьесаһы буйынса ҡуйылған “Ай тотолған төндә” спектакленең премьераһы үтте. Ул башҡорт әҙәбиәте классигының быйыл көҙҙә билдәләнә торған 105 йыллығына арнала. Мәшһүр әҙиптең үлемһеҙ әҫәре күп драма театрҙарында ҡуйылды, ә бына уның геройҙарын опера аша һынландырыу хәҙер инде үткән быуаттың 90-сы йылдарында, анығыраҡ әйткәндә, 1996 йылда булған. Киләһе йылына ул Мәскәүҙә лә Башҡортостан көндәре саралары ваҡытында күрһәтелә. Һәм бына арҙаҡлы театр ҡайтанан күренекле композиторыбыҙ Салауат Низаметдинов яҙған операға мөрәжәғәт итте. Был, һис шикһеҙ, республикабыҙ рухиәтендә, юғары сәнғәт даирәһендә оло ваҡиға. Әҫәрҙең ҡуйыусы дирижеры – Рәсәйҙең атҡаҙанған сәнғәт эшмәкәре, Башҡортостандың халыҡ артисы Валерий Платонов, әйткәндәй, беренсе спектаклде ҡуйыуҙа ла ҡатнашҡан. Режиссеры – Ләйсән Сәфәрғолова. Хореографы – Алина Мостаева, рәссамы – Санкт-Петербургтан саҡырылған йәш театр рәссамы Екатерина Малинина. Ул алдына ҡуйылған ижади бурысты – спектаклдә милли үҙенсәлекте һаҡлауҙы – атҡарып сыға алған. Төп партияларҙы: Тәңкәбикәне – Любовь Буторина, Дәрүиште – Артур Ҡәйепҡолов, Диуананы – Василий Ефимов (“Геликон-Опера” театрынан), Шәфәҡте – Эльвина Әхмәтханова, Зөбәржәтте – Әлфиә Кәримова, Аҡъегетте Роман Мамалимов башҡара. Классик әҫәр, һәр ваҡыттағыса, тамашасыларҙың иң нескә күңел ҡылдарын сиртеп, спектакль тамамланғансы көсөргәнештә тотто. Премьерала булыу бәхетенә ирешкән сәнғәт һөйөүселәр – төрлө милләт вәкилдәре сағыу тәьҫораттарға күмелеп, социаль селтәрҙә әҫәрҙе сәхнәгә сығарыуға ҡатнашы булған театр вәкилдәренә, ижади төркәмгә иң йылы һүҙҙәрен яуҙырҙы. “Трансляцияны ҡараным. Оҡшаны, тип әйтеү генә аҙ! Тетрәндем! Фажиғәле сюжет, раҫ килеп торған декорациялар, кейемдәр, һоҡланғыс оркестр һәм, әлбиттә, һоҡланғыс йырсылар! Ошоға ҡәҙәр спектаклдән алған кисерештәрҙән арына алмайым. Күҙ йәштәре сыҡҡансы хисләндерҙегеҙ!” – тип яҙа, мәҫәлән, Рәсәйҙең башҡа төбәгендә йәшәгән театр һөйөүсе С. Шабуров. “Ғәжәп спектакль! Бында ҡатнашҡан һәр кемгә оло рәхмәт! Һеҙ – текә! Алҡыштар етеңкерәмәне, тиер инем, әммә быны аңлатып була – күбеһе илауҙан туҡтаманы, шуға ҡапыл ғына үҙеңде икенсе тулҡынға көйләп булмай ине...” – тип сағыу хис-тойғолары менән уртаҡлаша Оксана Комарова исемле тамашасы. “Театрҙы Салауат Низаметдинов операһының һоҡланғыс премьераһы менән ҡотлайым! Афарин! Ҡуйылышы ла, башҡарыу ҙа, артистарҙың һәм оркестрҙың уйыны ла иҫ киткес!” – тип тәрән хөрмәтен белдерә Гүзәл Зәйнетдинова. Ошо бер нисә фекер генә лә Башҡорт дәүләт опера һәм балет театрында ҡуйылған милли балҡышлы классик әҫәрҙең ни кимәлдә күңелдәрҙе айҡағанын аңлап була. Театрҙы тағы бер ғәжәйеп спектаклгә байыуы менән ҡотлайбыҙ. Рәүилә Ғатауллина. Татьяна Ломовская фотолары (Башҡорт дәүләт опера һәм балет театрының матбуғат хеҙмәте).