Ишембайҙа йәшәгән 30 йәшлек ҡатын мутлашыусылар күрһәтмәһе буйынса бер миллион һумға яҡын кредит алған, әммә аҡсаны күсереүҙе һорағас, алданғанын аңлаған. Рәсәй Эске эштәр министрлығының Ишембай районы буйынса бүлегенә 30 йәшлек ҡатын мутлашыу осрағы тураһында мөрәжәғәт итә. Уның һүҙҙәренсә, ул мутлашыусылар менән аралашыуын шунда уҡ аңлай, әммә кредитты барыбер рәсмиләштерә. Ҡатын-ҡыҙ менән мутлашыусылар бер сәғәткә яҡын аралаша. Тәүҙә уның исеменән кредит тураһында ғариза булыуын белдереп "банк хеҙмәткәре" шылтырата. Инандырырлыҡ булһын өсөн шылтыратыусы был мәғлүмәтте мобиль ҡушымтала тикшерергә тәҡдим итә. Унда ысынлап кредиттың раҫланған суммаһы яҙылған була. Мутлашыусыларға ышанып, ҡатын ғаризаны үҙе тултыра һәм кредит аҡсаһын ала. Артабан шылтыратыусы ҡатынға аҡсаны яңы банк иҫәбенә күсереүҙе һорағас, зыян күреүсе ниҙер һиҙенә. Аҡса инде алынған булғас, быны ни өсөн эшләргә кәрәк һуң тигән һорауға мутлашыусы шунда уҡ ышандырырлыҡ итеп яуап бирә алмай. Шул саҡта ҡатын һөйләшеүҙе туҡтата. Иртәгәһенә ул хәлде асыҡлар өсөн банкка бара. Ундағы хеҙмәткәр кредитты ваҡытынан алда ябырға ярҙам итә һәм полицияға мөрәжәғәт итергә кәңәш бирә. Мутлашыу осрағы буйынса енәйәт эше ҡуҙғатыла. Ҡатын мутлашыу алымдары тураһында белһә лә, саҡ бәләгә тарымай. Хөрмәтле граждандар! Һәр кемегеҙгә шылтыратырға мөмкиндәр. Әгәр һаҡламда аҡсағыҙ булһа, уны алырға тырышасаҡтар, булмаһа, кредит алырға өндәйәсәктәр. Телефон аша һәм интернетта аралашҡанда һаҡ булығыҙ! Эске эштәр министрлығының БР буйынса матбуғат хеҙмәте. Нәсих Хәлисов фотоһы.