Студенттар #ӨЙҘӘ форумына йыйылды

Бөгөн, 1 февралдә, Өфөлә төрлө уҡыу йортары студенттары ҡатнашлығында #ӨЙҘӘ форумы үтте. Һуңғы йылдарҙа даими уҙғарылып килгән сараның төп маҡсаты – Башҡортостанда тыуып үҫеп, илдең төрлө уҡыу йорттарында белем алған студенттарҙы бергә туплау, уларҙы туған республикабыҙҙа хеҙмәт итеү мөмкинлектәре, йәш белгестәргә булдырылған ярҙам саралары менән таныштырыу. Быйылғы форумда Мәскәү, Санкт-Петербург, Ҡазан, Силәбе, Екатеринбург, Ырымбур, Һамар һәм башҡа ҡалаларҙағы юғары уҡыу йорттарында белем алған 300 самаһы йәш кеше ҡатнашты. Йыйын барышында улар республиканың алдынғы предприятиелары һәм кадрҙар хеҙмәте вәкилдәре менән аралашыу мөмкинлегенә эйә булды. - Бөгөн 30-ға яҡын эш биреүсе үҙ күргәҙмәһен булдырҙы. Улар араһында УМПО, “Гидравлика”, “Буринтех” кеүек эре сәнәғәт предприятиелары, ауыл хужалығы, төҙөлөш, транспорт тармаҡтарына ҡараған ойошмалар бар. Республика төбәктәре лә ситтә ҡалманы, мәҫәлән, Туймазы, Благовещен райондарындағы предприятиелар ҙур ихласлыҡ менән ҡатнашырға теләк белдерҙе. Шулай уҡ һаулыҡ һаҡлау өлкәһе бик киң йүнәлешле күргәҙмә тәҡдим итә. Бер кемгә лә сер түгел: бөгөн был тармаҡ кадрҙарға ҡытлыҡ кисерә, шуға күрә сит ҡалаларҙа белем алған йәштәребеҙ табиптар, башҡа төрлө медицина белгестәре булып үҙебеҙгә ҡайтһын ине, тигән теләктәбеҙ. Бында дәүләт ҡармағындағы ғына түгел, коммерция нигеҙендә эшләгән медицина ойошмалары, мәҫәлән, “Мать и дитя” клиникаһы, шифаханалар ҙа ҡатнаша. Быйыл әңгәмәләшеү пункттарын ойошторҙоҡ. Уларҙа теләге булған һәр йәш кеше аныҡ предприятиеның кадрҙар бүлеге хеҙмәткәрҙәре менән әңгәмәләшеү үтә ала, - тип һөйләне БР Ғаилә, хеҙмәт һәм халыҡты социаль яҡлау министрлығының бүлек начальнигы Нина Вишневская. Пленар өлөштө БР мәғариф һәм фән министры Илдар Мәүлетбирҙин асты. Ул ҡатнашыусыларға төбәк Башлығы Радий Хәбировтың сәләмен тапшырҙы. Илдар Марат улы сит төбәктә тыуып үҫеүе, уҡыуы, әммә йәш сағынан тап Башҡортостанда йәшәү, эшләү, ошонда ғаилә ҡороп төпләнеү хаҡында хыялланыуы тураһында һөйләне һәм республикабыҙҙа хеҙмәт баҫҡыстары буйынса үрләү, үҙеңде төрлө яҡлап асыу, үҫтереү өсөн мөмкинлектәрҙең етерлек булыуын билдәләне. Йәштәр БР Дәүләт Йыйылышы – Ҡоролтай депутаты Джефф Монсон, билдәле блогер Рәйес Ғәбитов, режиссер һәм продюсер Айнур Асҡаров һәм башҡа танылған шәхестәр менән аралаша, уларға үҙҙәрен ҡыҙыҡһындырған һорауҙарҙы бирә алды. Форумда ҡатнашыусыларға эш эҙләү һәм стажировка үтеү йәһәтенән оҫталыҡ дәрестәре күрһәтелде, стратегик сессияла юғары уҡыу йорттарында яҡташлыҡ ойошмалары төҙөү буйынса һөйләшеү барҙы. Студенттарға башҡорт милли аштары әҙерләү буйынса оҫталыҡ дәрестәре лә оҡшаны. Сара һуңында егеттәрҙе һәм ҡыҙҙарҙы бай мәҙәни программа – республиканың билдәле артистары ҡатнашлығында концерт көтә ине. #ӨЙҘӘ форумы студенттарға яңы мөмкинлектәргә юл аса, үҙеңде тыуған төйәгеңдә файҙалы шәхес итеп үҫтереүгә булышлыҡ итә. Фекерҙәр Рәмил МИРСАЯПОВ, Губкин исемендәге Рәсәй дәүләт нефть һәм газ университеты студенты: – Мин – Яңауыл ҡалаһынан. Лицейҙы тамамлағас, Мәскәүгә, үҙем теләгән уҡыу йортона инеү бәхетенә өлгәштем. Атайым да, ҡартатайым да – нефтселәр, уларҙың юлын лайыҡлы дауам итергә теләйем. Башта ҙур ҡалаға өйрәнеү еңел булманы, шулай ҙа тәүге сессияны уңышлы ғына тамамлап ҡайттым. Киләсәктә ҡайҙа эшләремде күҙалларға иртәрәк. Бында йәштәштәрем менән танышыу маҡсатын да күҙ уңында тотоп килдем. Дилназа ЙӘНГИРОВА, Ҡазан дәүләт сәнғәт институты студенты: – Үҙем хыял иткән уҡыу йортона, үҙем теләгән һөнәр буйынса уҡырға индем. Театр, кино һәм телевидение факультетында 2-се курста уҡыйым. Студент тормошо гөрләп тора, бик оҡшай. Үҙебеҙҙе төрлө ролдәрҙә һынап ҡарайбыҙ, мин, мәҫәлән, “Ромео һәм Джульетта” спектаклендә төп ролде – Джульеттаны башҡарҙым. Әлеге ваҡытта тағы бер спектакль сәхнәләштерәбеҙ. Үҙемде театр актрисаһы итеп күрәм. Әлегә киләсәк тормошомдо, ҡайҙа эшләйәсәгемде аныҡ ҡына әйтә алмайым, яҙмыш ҡайҙа илтер – ҡарарбыҙ. Никита УСМАНОВ, Магнитогорск дәүләт техник институты студенты: – Сибай ҡалаһында тыуып үҫтем. Форум хаҡында ишеткәс, мотлаҡ ҡатнашырға ҡарар иттем, сөнки алда эш урыны һайлау бурысы тора. Институттың һуңғы курсында белем алам, материалдарҙы художестволы эшкәртеү буйынса белгес булып сығасаҡмын. Бында үҙем өсөн байтаҡ кәрәкле мәғлүмәт алдым, эш биреүселәр менән аралаштым. Әгәр лайыҡлы хеҙмәт хаҡы, эш шарттары булһа, тыуған республикамда эшләргә теләгем ҙур. Айрат Нурмөхәмәтов фотолары.