Вуз-ара кампуста Фарма-үҙәк һәм Биоинженерия үҙәге лабораториялары асыла

Бөтә донъя кимәлендәге вуз-ара студенттар кампусының IQ-паркында Башҡорт дәүләт медицина университетының Биоинженерия үҙәге, Фарма-үҙәге, "Киләсәк медицинаһы" идаралығы, Трансфер үҙәге һәм Киберүҙәге урынлашасаҡ. Аддитив технологиялар лабораторияһы керамик материалдарға лаборатор, биомедицина һынауҙары комплекстарын үткәрә, улар артабан реконструктив хирургияла, травматологияла һәм ортопедияла, онкологияла, нейрохирургияла, яңаҡ-йөҙ хирургияһында һәм башҡа йүнәлештәрҙә ҡулланыласаҡ. Бында уҡ һанлы моделдәрҙе һынау һәм керамик имплантаттарҙың күҙәнәктәр һәм туҡымалар менән биологик процестарҙың компьютер моделдәрен эшләү - сит тәндең һәм организм туҡымаларының йәшәүсәнлеген тикшереү үткәреләсәк. Математик моделләштереү лабораторияһы медицина белгестәренең тупланған тәжрибәһен ҡулланырға мөмкинлек биргән уникаль программа тәьминәтен дә, импортты алмаштырыу программаһы сиктәрендә продукцияны ла булдыра. Атап әйткәндә, лаборатория белгестәре юғары температура процесында керамик имплантаттарҙың тығыҙлығы үҙгәреүен алдан күҙаллау өсөн уникаль программалар әҙерләгән. Сәп-ориентирланған һәм радиофармацевтик дарыуҙарҙы синтезлау лабораторияһы яңы биологик әүҙем берләшмәләрҙе синтезлау ысулдарын эшләү, физик-химик анализ ысулдарын үткәреү, һанлы моделдәр булдырыу һәм биологик процестарҙың компьютер моделдәрен эшләү, кәрәкле күләмдә яңы органик берләшмәләр эшләү менән шөғөлләнә. Молекуляр гибридтар һәм конъюгаттар лабораторияһы медицина, химия, биология һәм биотехнология өсөн ғәмәли әһәмиәткә эйә булған биоконъюгаттар эшләйәсәк. Тәү сиратта был яман шеш ауырыуҙарын дауалау өсөн перспективалы пептидтар һәм уларҙың конъюгаттарын эҙләү йәки дарыуҙарҙы ағза һәм туҡымаларға маҡсатлы алып барып еткереү. Кеше микробиомы лабораторияһы һау-сәләмәт кешеләрҙең һәм төрлө патологик хәлдәрҙәге ауырыуҙарҙың микробиомы проблемалары менән бәйле өлкәләрҙә заманса молекуляр-генетик ысулдар ҡулланып фундаменталь һәм ғәмәли фәнни тикшеренеүҙәр үткәрә. Психотроп саралар фармакологияһы лабораторияһы антидепрессив, нейропротектив һәм анальгетик тәьҫирле яңы молекулалар булдырыу буйынса тикшеренеүҙәр үткәрә, когнитив функцияларҙы яҡшыртыу сараларын өйрәнә, шул иҫәптән мейе ишемияһы һәм инсульттар ваҡытында. Бынан тыш, лабораторияла яңы матдәләрҙең тәьҫир итеү механизмы тикшерелә, уларҙың ағыулылығын баһалайҙар, психопатология моделдәрен эшләйҙәр. Бәләкәй маҡсатлы молекулаларҙы эҙләү лабораторияһы фармацевтика фәненең өҫтөнлөклө йүнәлештәре буйынса фәнни-тикшеренеү, белем биреү һәм инновацион эштәрҙе координациялай, тәьмин итә һәм башҡара, артабан уларҙы клиникаға тиклемге һәм клиник һынауҙар үткәреү өсөн GxP-пилот майҙансығына күсерә. "Киләсәк медицинаһы" идаралығы проекттарының береһе - уҡыусыларҙы БДМУ ҡарамағындағы профилле медицина кластарында, Өфө мәктәбенең медицина кластарында һәм Павлов кластарында әҙерләү. Был - һаулыҡ һаҡлау һәм медицина белеме өлкәһендәге өҫтөнлөклө йүнәлеш, ул төрлө яҡлы интеллект, тикшеренеү эше күнекмәләре, юғары мәҙәнилек кимәле булған, аңлы һайлау, БДМУ студенттарының һөнәри белем биреү программаларын үҙләштереү өсөн шарттар булдырыуға әҙер шәхес формалаштырыуҙы тәьмин итә. Технологиялар трансферы үҙәге инновация өлкәһендә студенттарҙың һәм хеҙмәткәрҙәрҙең үҫешен һәм белем биреү процесын тәьмин итә. ТТҮ аудиторияһына яңы технологияларҙы һәм инновацияларҙы ҡулланыу һәм коммерциялаштырыу менән ҡыҙыҡһынған студенттар, уҡытыусылар, тикшеренеүселәр, эшҡыуарҙар, стартаптар, партнерҙар һәм инвесторҙар инә. БДМУ-ның киберүҙәге технологиялар һәм һанлаштырыуҙың кеше һаулығына йоғонтоһо өлкәһендә фәнни тикшеренеүҙәр йүнәлешен үҫтерә, грант проекттары әҙерләй. Киберүҙәк бөтә студенттар файҙалана алған ҡеүәтле ҡорамалдар ярҙамында студенттар берләшмәләре өсөн берҙәм юғары технологиялы үҙәк булырға ынтыла. Приоритеттарҙың береһе - университеттың һәр сараһына технологик ярҙам күрһәтә алырлыҡ киберирекмәндәрҙең ҙур командаһын булдырыу. Сығанаҡ: https://pravitelstvorb.ru/news/22879/