Андрей Назаров Өфө районының социаль-иҡтисади үҫеше буйынса кәңәшмә үткәрҙе

Башҡортостан Республикаһы Хөкүмәте Премьер-министры Андрей Назаров Өфө районының социаль-иҡтисади үҫеше мәсьәләләре буйынса күсмә кәңәшмә үткәрҙе. Фекер алышыуҙа Башҡортостан Хөкүмәте ағзалары, республика министрлыҡтары һәм ведомстволары етәкселәре ҡатнашты. Кәңәшмәне асып, Хөкүмәт Премьер-министры Өфө районының үҫешен билдәләне. Абсолют күрһәткестәр буйынса муниципалитет һәр ваҡыт тиерлек республикала иң яҡшы бишәү иҫәбенә инә. Өфө районы хакимиәте башлығы Николай Ельников һүҙҙәренсә, фаразлау күрһәткестәре халыҡ һанының артабан йыл һайын ике процентҡа тотороҡло үҫеүен күҙаллай. Демографик хәлгә муниципалитетта тыуымдың артыуы, әүҙем торлаҡ төҙөлөшө һәм баш ҡалаға яҡын урынлашыуы ыңғай йоғонто яһай. Артабан кәңәшмәлә Башҡортостан Хөкүмәте ағзалары, республика министрлыҡтары һәм ведомстволары етәкселәре докладтар менән сығыш яһаны. Ҙур фекер алышыуға йомғаҡ яһап, Башҡортостан Премьер-министры эшсе төркөмө булдырып, Өфө районының инфраструктура үҫеше буйынса стратегик "юл картаһы"н булдырыу кәрәклеген һыҙыҡ өҫтөнә алды. - Беҙгә 2030 йылға тиклем аныҡ маҡсатлы йүнәлештәрҙе күҙалларға кәрәк. Атап әйткәндә, сәнәғәт етештереүе күләме буйынса - 60 миллиард һумдан кәм түгел, йәки 30 процентҡа, тулайым ауыл хужалығы продукцияһы күләме буйынса - 16 миллиард һумдан кәм түгел, 2023 йыл кимәленә ҡарата 1,5 тапҡырға үҫеште тәьмин итергә кәрәк. Йыл һайын 500 мең квадрат метрҙан кәм булмаған торлаҡ төҙөргә һәм эш хаҡын 1,5 тапҡырға, йәғни 120 мең һумдан арттырырға. Инвестициялар күләмен ике тапҡырға үҫтереп, 20 миллиард һум кимәленә сығырға. Килемде күбәйтеү өсөн бюджетты йылына кәм тигәндә 10 процентҡа арттырыу буйынса төҙәтмәләр индерәбеҙ. Был һандарҙың барыһы ла тормошҡа ашырлыҡ, - тине Андрей Назаров. Сығанаҡ: https://pravitelstvorb.ru/news/22874/