30 ғинуарҙа Өфөлә Башҡортостан Башлығы Радий Хәбиров республиканың блогерҙар берләшмәһе вәкилдәре менән осрашты. «Йәшлек House» йәштәр киңлегендә үткән осрашыуҙа ҡатнашыусыларҙың дөйөм яҙылыусылар һаны 15 миллион самаһы кеше тәшкил итә. Был хаҡта республика етәксеһе социаль селтәрҙә лә хәбәр итте. - Йәмғиәтебеҙҙәге был мөһим коммуникаторҙың ролен һәм әһәмиәтен яҡшы аңлайым. Шуға күрә социаль селтәрҙәге аккаунттарымды үҙем алып барам, – тип билдәләне Радий Хәбиров. - Төбәк етәксеһенең социаль селтәрҙәре ошо рәүешле ҡоролған: был власть органдарына һүҙеңде еткерә алыуҙың иң һөҙөмтәле ысулы. Ҡайһы бер мәсьәләләрҙе тиҙ хәл итә алабыҙ, башҡалары күберәк ваҡыт талап итә. Шуға күрә мин урындағы коллегаларымдан ҡатмарлы хәлдәргә иғтибар итеүҙәрен һәм халыҡтың үтенестәренә ваҡытында яуап биреүҙәрен һорайым. Блогер Гүзәлиә Әбүбәкирова Башҡортостан Башлығынан Өфөнөң 450 йыллығына әҙерлек барышы тураһында һораны. Мәғлүм булыуынса, республиканың баш ҡалаһы юбилейын 2024 йылда билдәләйәсәк. Юбилейға Өфөлә ҙур спорт объекттары ла төҙөлә. Улар иҫәбендә - Фехтование үҙәге, уны быйыл октябрҙә тапшырырға планлаштыралар. Ишеү слаломы үҙәгенең беренсе сираты май айында тәүге ярыштарҙы ҡабул итәсәк. Икенсе сиратта – тренажер залдары һәм тренерҙар бүлмәләре менән административ-көнкүреш комплексы – 2025 йылдың аҙағына тамамланасаҡ. – Әлбиттә, иң мөһим объекттарҙың береһе - 3,5 мең урынлыҡ Көрәш һарайы һәм 18 келәмлек ярыш майҙаны. Унда СПА-үҙәк тә, ҡунаҡхана ла, медицина блогы ла, бассейн да буласаҡ. Был ҙур комплекслы объект, - тине Радий Хәбиров. Шулай уҡ Өфөнөң 450 йыллығына аэропортты реконструкциялау тамамланасаҡ, Ағиҙел йылғаһы буйында Башҡортостан менән Абхазия араһындағы дуҫлыҡ хөрмәтенә колоннада ҡуйыласаҡ, шулай уҡ ҡаланың тарихи үҙәгендә Ленин, Карл Маркс, Пушкин, Коммунистик һәм Яңы Күпер урамдары төҙөкләндереләсәк. Киләсәктә тағы ла ике ҙур юбилей объектын төҙөй башлау күҙаллана. Һүҙ Фән һәм мәҙәниәт йорто (Башҡортостан ДНК-һы) һәм Республика физика-математика лицей-интернаты хаҡында бара. Өфөнән күп балалы әсәй Ирина Сухарева 2024 йылда илебеҙҙә студенттар отрядтары хәрәкәтенең 65 йыллығын, шулай уҡ «Рәсәй студенттар отрядтары» йәштәр ойошмаһының 20 йыллығын билдәләнеүе хаҡында һөйләне. – Быйыл республика Волга буйы федераль округының студенттар отрядтары слетын ҡабул итәсәк. Һеҙҙән, Радий Фәрит улы, ошо хәрәкәт ветераны булараҡ, күләмле йәштәр форумына әҙерләнеү һәм уны үткәреү буйынса ойоштороу комитетын етәкләүегеҙҙе һорайбыҙ, – тине Ирина Сухарева. Йәш әсәйҙең тағы бер һорауы – күп балалы ғаиләләрҙең бәхет сығанағы икәнлеген хәҙерге йәштәргә еткереү. - Илдең хәҙерге үҫеш этабындағы ҡатмарлы мәлдәрҙең береһе - милләтте һаҡлау. Бының өсөн күп һанлы дәртләндереү саралары, шул иҫәптән әсәлек капиталы булдырылған. Әммә хәҙер финанс саралары ғына һөҙөмтә бирмәй. Илебеҙҙә тыуым процестарының төп асылын аңламайынса, был мәсьәләне хәл итмәйәсәкбеҙ, - тип иҫәпләй Радий Хәбиров. - Был йәһәттән йолалар, дин ярҙамға килә ала. Блогер, табип-психотерапевт, Өфө фән һәм технологиялар университеты доценты Марат Шафиғуллин Өфөлә психоонкология хеҙмәтен асырға тәҡдим итте һәм проектҡа мәғлүмәти ярҙам күрһәтеүҙе һораны. Башҡортостан Башлығы билдәләүенсә, был идеяны белгестәр менән бергә анализларға кәрәк. Февралдә иһә Өфөлә Балалар онкологияһы Һәм гематологияһы үҙәген асыу планлаштырыла, тип хәбәр итте төбәк етәксеһе. Шулай уҡ республика Башлығына креатив йәштәр өсөн майҙансыҡ булдырыуҙы һорап мөрәжәғәт иттеләр, көнүҙәк социаль мәсьәләләрҙе тикшереү һәм уларҙы хәл итеү өсөн объектив позициялы республика блогерҙар берләшмәһен ойоштороу, «Пушкин картаһы» федераль программаһының мөмкинлектәрен киңәйтеү кеүек тәҡдимдәр ҙә яңғыраны. Блогер һәм йәмәғәт эшмәкәре Рөстәм Нәбиев Башҡортостан Башлығына 2024 йылды республикала Һаулыҡ мөмкинлектәре сикләнгән кешеләр хаҡында хәстәрлек күреү йылы тип иғлан иткән өсөн рәхмәт белдерҙе һәм ошоға бәйле республиканың идара итеү командаһы алдында ниндәй бурыстар тороуы менән ҡыҙыҡһынды. - Беренсенән, йыл дауамында төрлө сәбәптәр арҡаһында тулы ҡеүәтенә йәшәргә мөмкинлектәре булмаған айырым кешеләрҙең беҙҙең эргәлә йәшәүе хаҡында һөйләйәсәкбеҙ. Шуға күрә беҙҙең алда һаулыҡ мөмкинлектәре сикләнгән кешеләр өсөн уңайлы мөхит булдырыу бурысы тора, – тип һыҙыҡ өҫтөнә алды Радий Хәбиров. Республика Башлығы мөмкинлектәре сикләнгән кешеләргә ярҙам итеү менән бәйле ҡануниәт анализланасаҡ һәм тейешле закондар сығарыу инициативалары ҡараласаҡ, тип билдәләне. Атап әйткәндә, яраланған хәрбиҙәрҙе хеҙмәттән бушатыу процедураһын көйләргә кәрәк. Фото: glavarb.ru