“ Көнбайыш беҙҙе яңы партнерҙар табырға мәжбүр итте”

“РБК-Уфа” телеканалы Башҡортостан Хөкүмәте Премьер-министры Андрей Назаров менән ҙур интервью ойошторған. Министрҙар кабинеты етәксеһе республиканың тышҡы иҡтисади эшмәкәрлегенә баһа бирҙе, пландары, перспективалы партнерҙар һәм төбәктең потенциалы тураһында һөйләне. Уның әйтеүенсә, һуңғы йылдарҙа Рәсәйгә санкциялар баҫымы яһалыуына ҡарамаҫтан, 110-дан ашыу ил менән мөнәсәбәттәр һаҡлана. Айырыуса ун ил менән тышҡы тауар әйләнеше яҡшы ойошторолған. Бына улар: Ҡытай, Төркиә, Беларусь, Берләшкән Ғәрәп Әмирлектәре, Үзбәкстан, Ҡаҙағстан, Латвия, Ҡырғыҙстан, Нидерланд, Иран. Лидерлыҡты Ҡытай тота, унан ҡала Ҡаҙағстан, Төркиә, Беларусь Республикаһы килә. “Был илдәр менән эш яҡшы ойошторолған, шуға күрә борсолмайбыҙ, – тине Премьер-министр. – Йөҙҙән ашыу илгә беҙҙең продукция оҙатыла. Башҡортостан экспортының яртыһынан күбеһе энергетик булмаған тауарҙар тәшкил итә”. Андрей Назаров Ҡаҙағстандың күптәнге тарихи мөнәсәбәттәр нигеҙендә стратегик партнер булыуын, башҡорттарҙың һәм ҡаҙаҡтарҙың менталь рәүештә бер-береһен яҡшы аңлауын, был илдә үҙҙәрен ышаныслы тойоуын билдәләне. Ул яңыраҡ республика делегацияһының Башҡортостан Башлығы Радий Хәбиров етәкселегендә Ҡаҙағстанға рәсми бизнес-миссия ойоштороуын юғары баһалап, үҫешкә юл асыуын әйтте. Былтыр ике республика араһында тауар әйләнеше 400 миллион доллар тәшкил иткән. Премьер-министр фекеренсә, был беҙҙең мөмкинлектәргә тап килеп бөтмәй, потенциал ике-өс тапҡырға юғарыраҡ. ”Ҡаҙағстан етәкселәрен 2024 йылда Өфөлә үтәсәк Рәсәй һәм Ҡаҙағстандың төбәк-ара хеҙмәттәшлегенең XX юбилей форумында көтәбеҙ. Беҙҙең предприятиелар Ҡаҙағстан биләмәһендә эштәрҙе билдәләне. Иң эреһе – Башҡортостан сода компанияһы. Ул бында химик-металлургия кластеры булдырасаҡ. Урал пружиналар заводы, Белореттағы беҙҙең компания, быйыл Ҡустанайҙа биш миллион доллар инвестициялар күләме менән эш башлаясаҡ. Ҡайһы бер проекттар буйынса әле фекер алышабыҙ”, – тине Андрей Назаров. Ул шулай уҡ Ҡытай, Беларусь Республикаһы менән хеҙмәттәшлеккә, пландарға, йүнәлештәргә туҡталды. – Әгәр Көнбайыштың санкция сәйәсәте булмаһа, беҙ аҡрыныраҡ үҫешер инек. Партнерҙарыбыҙ булып Көнбайыш илдәре ҡалыр ине. Бөгөн Азия, Көнсығыш беҙҙең өсөн тотороҡло һәм перспективалы партнерҙар булып ҡала. Һәм беҙ был осорҙо яңы мөмкинлектәр өсөн файҙаланабыҙ, – тине Хөкүмәт Премьер-министры Андрей Назаров. Фото: https://pravitelstvorb.ru/news/22865/