Баш ҡалабыҙҙа Башҡортостан Башлығы Радий Хәбиров республика яҙыусылары менән осрашты. Унда башҡорт әҙәбиәтен үҫтереү, авторҙарға һәм нәшриәт эшмәкәрлегенә ярҙам итеү, ижади әҫәрҙәрҙе уҡыусылар даирәһен киңәйтеү, шулай уҡ йәштәргә әхлаҡи һәм патриотик тәрбиә биреү мәсьәләләре ҡаралды. Осрашыуҙа төбәк етәксеһе Башҡортостан яҙыусыларына күп йыллыҡ хеҙмәт һәм әүҙем гражданлыҡ позицияһы өсөн рәхмәт белдерҙе. - Яҙыусыларҙың һәм шағирҙарҙың ижади эшмәкәрлеге республикабыҙ һәм бөтә ил тормошоноң әхлаҡи өлөшөн формалаштырыуҙа бик әһәмиәтле. Бигерәк тә бөгөн, бергәләп ауыр һынауҙар үткәндә, һеҙҙең һәр һүҙегеҙ тәрән мәғәнәгә эйә. Һеҙҙең хеҙмәтегеҙгә, ысынлап та, бик күп нәмә бәйле, – тине Радий Хәбиров. Махсус хәрби операция ваҡытында Ватанды һаҡлаусыларҙың ҡаһарманлығы тураһында әҫәрҙәр ижад иткән авторҙарға республика ярҙам итергә әҙер, тип билдәләне ул. Был осраҡта яҙыусыларға 10 мең миллионға тиклем грант бүленәсәк. Һуңғы бер йыл эсендә йылдам үҫешеп, бихисап республика, халыҡ-ара саралар уҙғарып уңышлы эшләп киткән ижади берекмә бөгөн шулай уҡ ҡатмарлы осор кисерә. Был турала Башҡортостан кинематографистар союзы рәйесе һәм Яҙыусылар союзы ағзаһы Зөһрә Бураҡаева: – Баймаҡ ваҡиғалары кемдең кем икәнен күрһәтте. Бер үк яҙыусылар бөтә һөжүмде үҙҙәренә ала. Ҡалған яҙыусылар исем, ярҙам, дан кәрәк булһа ғына йүгереп йөрөй. Бөгөн республика Башлығына терәк кәрәк булғанда, әйҙәгеҙ әүҙемлек күрһәтәйек, ошондай ауыр ваҡыттарҙа етәкселек һәм халыҡ менән бергә булайыҡ, – тип саҡырҙы. Ә иһә Башҡортостан Яҙыусылар союзы рәйесе Айгиз Баймөхәмәтов ижади берекмәнең төп эш йүнәлештәре хаҡында һөйләне. Ижади ойошмаға шиғриәт, проза һәм балалар әҙәбиәте өлкәһендә эшләгән 300-гә яҡын автор инә һәм улар бөгөн Әҙәбиәтсе йортона, Яҙыусылар союзының төп бинаһын төҙөкләндереүгә мохтажлыҡ кисерә. Быларҙың барыһы ла ижади берекмәнең 90 йыллыҡ юбилейына әҙер буласаҡ, тигән һығымта менән тамамланы яҙыусылар республика Башлығы менән осрашыуҙы. Автор фотоһы.