Бөгөн Хөкүмәттең аҙналыҡ кәңәшмәһендә халыҡ кәсептәрен тергеҙеү һәм үҫтереү темаһына һөйләшеү булды. Вице-премьер – сәнәғәт, энергетика һәм инновациялар министры Александр Шельдяев хәбәр итеүенсә, республикала 17 төр халыҡ художестволы кәсептәре иҫәпләнә. Был матур итеп ташты эшкәртеү, ағасҡа яҙыу, милли кейемдәр әҙерләү, сувенирҙар, һауыт-һаба эшләү һәм башҡалар. Уҙған йылдың 11 айында етештереү күләме 233,5 миллион һум тәшкил иткән. Башҡортостанда был тармаҡта 500 самаһы кеше мәшғүл. Был тармаҡта эшләгән 14 республика ойошмаһының өсөһө генә рәсми теркәлгән – “Ағиҙел” предприятиеһы, “Артель” уҡытыу-етештереү предприятиеһы һәм “Салауат” ательеһы. Теркәләү уларға төрлө федераль ярҙам саралары алыуға ярҙам итә, шул иҫәптән НДС түләүҙән азат ителергә мөмкин. Федераль бюджеттан ярҙам ала алған Рәсәй ойошмалары араһында Башҡортостандан бер генә предприятие ингән – “Ағиҙел”. Былтыр улар 12,9 миллион һумлыҡ субсидия алған. Халыҡ кәсептәрен үҫтереү буйынса республика программаһы буйынса 2023 йылда төбәк бюджетынан 11 миллион һум аҡса йүнәлткәндәр. Быйыл рәсми теркәлгән предприятиелар һанын арттырыу бурысы тора. – Мин был сәнғәтте, халыҡ кәсептәрен үҫтерә башлауҙы күреп ҡыуанам. Һәр районда оҫтаханалар барлыҡҡа килә. Иң мөһиме – һорау арта. Ҡатын-ҡыҙҙар милли биҙәүестәргә ҙур ҡыҙыҡһыныу уята, – тине Радий Хәбиров. Башҡортостан Башлығы кәсепселәрҙең форумын үткәрергә һәм унда булған барлыҡ мәсьәләләрҙе хәл итергә тәҡдим итте. Фото: Башҡортостан Башлығы сайты.