15 күпер, 32 юл үткәргес, ике развязка булдырыу ниәтләнә Дүртөйлө – Ачит юлының тәүге этабын төҙөү барышында. Белгестәр юлдың төп ҡоролмаһы эшенә – Ағиҙел йылғаһы аша күпер эшенә кереште, тип хәбәр итә “Рәсәй автомобиль юлдары” компанияһы. 140 километр оҙонлоҡҡа тиң был участка Екатеринбургҡа тиклем “Восток” М-12 тиҙлекле магистраленең дауамына инәсәк. Был саралар “Транспорт инфраструктураһын модернизациялау” милли проектына (национальный проект "Модернизация транспортной инфраструктуры") ярашлы башҡарыла. Был күпер Борай районының Вострецово ауылы эргәһендә урынлашҡан, ҡоролма 11 терәүҙә торасаҡ. Бөгөнгө көндә күпер эшләүселәр терәүҙәрҙе бетон менән нығытыу эше менән шөғөлләнә. Шулай уҡ башҡа саралар күрелә. Шулай уҡ Дүртөйлө – Ачит юлының тәүге этабында ямғыр канализацияһын булдырыу, яҡтыртыу терәүҙәрен, интеллектуаль транспорт системалары өсөн инфраструктура эшләү бара. Йәйге миҙгел өсөн материалдарҙы әҙерләү ҙә дауам итә. Дөйөм оҙонлоғо 275 километрға тиң Дүртөйлө – Ачит участкаһында “Восток” М-12 төҙөү өс этапҡа бүленгән. Тәүгеһе Башҡортостанда башҡарыла, икенсеһе – Пермь крайында, өсөнсөһө Свердловск өлкәһендә. Төҙөлөш эштәрен 2024 йылға тамамлау ниәтләнә. “Транспорт инфрастуктураһын модернизациялау” милли проекты үҙенә туғыҙ федераль проектты индерә. “Восток” М-12 тиҙлекле автомобиль юлында “Рәсәй” транспорт маршрутын булдырыуҙан тыш, ул диңгеҙ порттары үҫешенә һәм Төньяҡ диңгеҙ юлы үҫешенә йоғонто яһай. Милли проекттар Рәсәй Президенты ҡарары буйынса 2019 йылдан тормошҡа ашырыла. Фото: “Башҡортостан” ДТРК-һы.