Ошо ауылда йәшәүсе педагог, әүҙем йәмәғәтсе Гөлнур Заһирова беҙгә түбәндәге яҙманы ебәргән: “Үҙеңде һәм эргәңдәге кешеләрҙең тормошон яҡшыртам тиһәң, ҡул ҡаушырып ултырма!” – республикала киң танылыу яулаған урындағы башланғыстарға булышлыҡ итеү программаһы тап ошо принцип буйынса эшләй. Учалы районында һуңғы йылдарҙа программа нигеҙендә барлыҡҡа килгән спорт, балалар майҙансыҡтары, яңыртылған социаль учреждениелар, заманса яҡтыртылған урамдар – берҙәм тырышлыҡ һөҙөмтәһе. Бар проекттар республика, урындағы бюджет һәм халыҡтың үҙе йыйған аҡсаһына тормошҡа ашырыла. Район биләмәһендә урынлашҡан предприятиелар ҙа, бағыусылыҡ ярҙамы күрһәтеп, ҙур өлөш индерә. Бигерәк тә Учалы тау-байыҡтырыу комбинатының, Башҡорт алтын табыу компанияһының, Учалы тегеү фабрикаһының өлөшө тос. Бөтә нәмә лә үҙеңдән тора, тырышһаң, ауыл ерендә лә уңайлы шарттар тыуҙырып, рәхәтләнеп йәшәп була. Өҫтәүенә, халыҡтың йәшәйешен, көнкүрешен еңеләйтеүгә йүнәлтелгән ошодай программаларҙың булыуы иртәгәһе көнгә өмөт менән ҡарарға мөмкинлек бирә. “Наурыҙ ауыл биләмәһе лә “Урындағы башланғыстарға булышлыҡ итеү” программаһында ҡатнашып, бихисап проектты тормошҡа ашырҙы. 2014 йылда Наурыҙ ауылының зыяраты кәртәләнгән, 2015 йылда балалар майҙансығы төҙөлгән, 2017 йылда биләмәгә ҡараған Мәҫкәү ауылы мәктәбенә капиталь ремонт яһалған, 2018-2020 йылдарҙа Йәһүҙә, Ташҡыя, Ғәҙелша ауылдары урамдарына энергия һаҡлағыс яҡтыртҡыстар ҡуйылған. 2022 йылда Наурыҙ урта мәктәбенең ҡыйыҡ башына капиталь ремонт үткәрелде. Был эштәр фәҡәт биләмә халҡының үҙенең тырышлығы арҡаһында ғына тормошҡа ашырылды. Күп урында халыҡтан аҡса йыйыу мәсьәләһе ауырлыҡ тыуҙыра, ә беҙҙең биләмәлә киреһенсә, халыҡ үҙе йүгереп йөрөй. Ауылдағылар ҙа, ситтә йәшәүселәр ҙә ҙур әүҙемлек күрһәтә” , – тип яҡташтарына маҡтау һүҙҙәрен яуҙырҙы хакимиәт башлығы Гөлсинә Фәттәхова. Әйткәндәй, Наурыҙ ауыл советы быйыл да “Урындағы башланғыстарға булышлыҡ итеү” программаһында ҡатнашырға иҫәп тота. Ошо маҡсатта талаптарға ярашлы йыйылыштар уҙғарындлған, борсоған проблемалар, хәл итәһе мәсьәләләр асыҡланған. Быйыл Мәҫкәү ауылында балалар майҙансығы төҙөү күҙ уңында тотола. Ауылда балаларҙың шат тауыштары ишетелгән саҡта уның киләсәге лә өмөтлө була”, - тип яҙа Гөлнур Заһирова. Фото авторҙыҡы.