Советтар Союзы Геройы Тәфтизан Миңлеғоловтың данлы вариҫтары әле лә һынатмай. Илдә өлөшләтә мобилизация башланғас та Күсей ауыл биләмәһенән ундан ашыу егет махсус хәрби операцияға юлланды, бер нисә ир-егет үҙҙәре теләп доброволец булып китте. Ауыл халҡы уларҙың имен-һау әйләнеп ҡайтыуҙарын теләп, изге уй-ниәттәр менән ҡорбан сала, аяттар бағышлай. Бар илгә килгән ауырлыҡты бергә булғанда ғына еңеп сығырға мөмкин булыуын улар яҡшы аңлай. Шуға күрә яҡташтары өсөн аҡса йыйып, мәктәп ашханаһында борщ, быҡтырылған ит эшләнеләр, ҡатын-ҡыҙҙар һалма йәйҙе. Шулай уҡ яугирҙәргә кәрәк-яраҡ, йылы кейем-һалым тупланған гуманитар ярҙам даими рәүештә туплана. Күптән түгел ҡатын -ҡыҙҙар окоп шәме эшләгән. Ошо көндәрҙә Күсей ауылының өс ир-егете тәүәккәлләп махсус хәрби операция биләмәһендә булған туғандары һәм ауылдаштары янына "Ларгус" автомобилендә юлға сығып, уларға йылы кейем, башҡа кәрәк-яраҡ, ата-әсәләре, ҡатындары әҙерләгән күстәнәстәр, ауылдаштарының ҡайнар сәләмдәрен алып барҙы. Улар менән ҡыҫҡа ваҡытҡа ялған ҡайтҡан яугир ауылдаштарын да бергә алып барғандар. Рөстәм Б. үҙенең автомобилендә Рифат Б. һәм Юнир Ә. менән меңәр саҡрымдар юл үтеп, алғы һыҙыҡтағы ауылдаштары менән осрашҡан. Әйткәндәй, Күсей ауылынан берҙән-бер батыр ҡыҙ Г. алғы һыҙыҡта яралы яугирҙәргә тәүге ярҙам күрһәтә, уларҙың һаулығын ҡайғырта. Ауылдаш ағайҙары һәр саҡ уны ла күстәнәсһеҙ ҡалдырмай. Әйткәндәй, ауылымдың был тәүәккәл егеттәре яу яланына тәүге тапҡыр ҡына бармай. Барыһы ла махсус хәрби операция биләмәһендәге яугирҙәрҙең замполиттары аша һөйләшеүҙәр менән атҡарыла, хәрби талаптар мотлаҡ үтәлә. Шулай уҡ Күсей егеттәре күрше Иҫәнбәт, Төркмән, Әхмәр, Моҡас ауылдары һәм Баймаҡ, Сибай ҡалаһынан да бергә булған яугирҙәрҙең туғандарынан посылкалар алып барҡан. Уларҙың туғандары һәр көн һайын тиерлек егеттәргә шылтыратып, рәхмәттәрен еткерә. Алыҫ Себер яҡтарында эшләгән, ошоға тиклем һәр саҡ МХО-ға бергә барған Раушан И. был юлы эштә булыу сәбәпле бара алмағас, бергә эшләгән иптәштәре менән медицина кәрәк-яраҡтары, төрлө дарыуҙар, бинттар туплап, яугирҙәргә ебәргән. Уның был ярҙамын Г. эшләгән госпиталдә ҡалдырып киткәндәр. "Бигерәк тә бинттар, медикаменттар өсөн ныҡ ҡыуандылар", -ти егеттәр. Тимәк, яралыларға даими рәүештә бындай әйберҙәр кәрәк. Афарин, ауылдаштарым! Ауыр ваҡытта ла үҙегеҙҙекеләрҙе ташламай, меңәр саҡрым юл үтеп, ике-өс сәғәтлек осрашыу өсөн ашҡынып барыуығыҙ үҙе үк оло батырлыҡҡа тиң! Артабан да берҙәм булығыҙ, төрлө һынауҙарҙы бергә еңеп сығығыҙ! Ә инде махсус хәрби операцияла ҡатнашҡан барлыҡ яугирҙәрҙең дә тиҙерәк тыуған яҡтарына әйләнеп ҡайтыуҙарын, ата-әсәләре, һөйгән йәрҙәре һәм балалары менән осрашыуҙарын теләйбеҙ. Фото: Рифат Б.