Башҡортостанда йөклө һәм репродуктив йәштәге ҡатындарҙың һаулығын һаҡлау өсөн яңы технологиялар ҡулланыла. Төбәктә сабыйҙар үлеме һиҙелерлек кәмегән. Был хаҡта Һаулыҡ һаҡлау министрлығы хәбәр итә. Республикала 899 меңдән ашыу бала иҫәпләнә. Шуларҙың 98 проценты былтыр профилактика тикшереүҙәре менән солғап алынған. Медицина учреждениеларында махсус һәм юғары технологиялы ярҙамды 3 629 бала алған. 1689 бала федераль үҙәктәргә дауалау өсөн ебәрелгән. Республика балалар клиник дауаханаһы тәүлек әйләнәһенә телемедицина консультациялары үткәрә. Бындай юғары технологиялы ярҙам күләме йылдан-йыл арта. Былтыр Башҡортостанда йәшәүсе балаларҙың һәр дүртенсеһе шифаханаларҙа дауаланды, ун меңдән ашыу бала медицина реабилитацияһы үтте.12 ай эсендә сабыйҙар үлеме күрһәткесе ете процентҡа кәмегән. Бер килограмдан түбәнерәк ауырлыҡта тыуған балаларҙың 85 проценты йәшәүгә һәләтле булып сыҡҡан. 2024 йылда ваҡытынан алда тыуған, ауыр сирҙәр кисергән балаларҙы күҙәтеү хеҙмәтен киңәйтеү күҙ уңында тотола. Үҫмерҙәрҙең репродуктив сәләмәтлеген һаҡлау үҙәге асыласаҡ. Шулай уҡ быйыл ирҙәр һәм ҡатындар өсөн махсус диспансерлаштырыу башлана. Рәсәй Президенты Владимир Путиндың “май” указдарына ярашлы, һаулыҡ һаҡлау тармағы алдында торған ошо бурыстарҙы тормошҡа ашырырға кәрәк: хеҙмәткә һәләтле йәштәге халыҡтың үлем күрһәткестәрен кәметеү, шулай уҡ яман шештәрҙән үлем күрһәткестәрен (100 мең кешегә 185 сир осрағына тиклем) аҙайтыу; сабыйҙар үлемен бер мең тыуған балаға 4,5 осраҡҡа тиклем кәметеү. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Нәсих Хәлисов фотоһы.