Бөгөн Өфөнөң “Торатау” конгресс-холы эргәһендәге майҙанда Башҡортостан Башлығы Радий Хәбировҡа теләктәшлек белдереп концерт үтте. Унда республикабыҙҙың танылған артистары ла, йәш таланттар ҙа сығыш яһаны. Сығыштарҙа республикабыҙ тотороҡлоғона өндәү, берҙәм булыуға саҡырыу яңғыраны. Концерт күрергә килгән әңгәмәселәремдең фекерендә ошо сағылды. Башҡортостан Дәүләт Йыйылышы –Ҡоролтай депутаты, Бөтә донъя башҡорттары ҡоролтайының башҡарма комитеты рәйесе Юлдаш Йосопов бына нимә тине: -Бөгөнгө сараның әһәмиәте бик ҙур. Сөнки беҙҙең ата-бабаларыбыҙҙың халыҡтар дуҫлығы өлкәһендә тәжрибәһе бик бай. Беҙ быуаттар дауамында үҙ-ара татыу йәшәнек. Ошо татыулыҡты һаҡлау өсөн бик күп көс түгелде. Беҙҙең әлеге ваҡытта төп бурысыбыҙ – ошо татыулыҡты, халыҡтар араһындағы дуҫлыҡты һаҡлау. Бары тик берҙәмлегебеҙ, халыҡтар араһындағы дуҫлығыбыҙ Башҡортостан Республикаһының үҫешенең нигеҙе булып тора. Ниндәй генә һынауҙар булмаһын, бары тик бергә генә ошо һынауҙарҙы үтә алырбыҙ, -тине ул. Әлеге сараға төрлө райондарҙан да килгәйнеләр. Көн һалҡынса булыуға ҡарамаҫтан, уларҙа ла рух ныҡлығы тойолдо. Миәкә районынан килгән делегация составында Боғҙан ауыл хакимиәте башлығы Ринат Кәримов менән ошо ауыл советы депутаты Хәниф Ибраһимовты тап иттек. -Бөгөн беҙ Радий Хәбировҡа теләктәшлек белдерергә килдек. Тормошобоҙ алға бара тип әйтә алабыҙ. Юлдар төҙөкләндерелә, газ, һыу уңайлыҡтары менән ҡулланабыҙ, урамдарҙы яҡтыртыу буйынса саралар күрелә. Халыҡтың йәшәү шарттары яҡшыра. Был йәһәттән республика етәкселеге тарафынан ярҙам тойола. Артабан тормошобоҙ тағы ла яҡшырһын өсөн бергәләп эшләргә кәрәк, - тине Ринат Кәримов. Ишембай яҡтарынан да байтаҡ килгәйнеләр. Этҡол моделле китапханаһы мөдире Гөлдәр Йәрмөхәмәтова әлеге саранан ҡәнәғәт булыуын белдерҙе: -Концерт бик оҡшаны, рух ныҡлығы тойолдо унда. Халыҡты берҙәмлеккә, татыулыҡҡа өндәгән сара булды был. Артабан да берҙәм булайыҡ. Шул ваҡытта еңелмәбеҙ, көслө булырбыҙ, - тине ул. Концерт халыҡтың күңеленә хуш килде. Күптәр артистарға ҡушылып йырланы, бейене. “Беҙҙең теләгебеҙ бер – республикала барыһы тыныс, имен булһын” тигән фекерҙәрҙе лә ишеттем байрамға килгән башҡа әңгәмәселәремдән. Автор фотолары.