Борай районының Яңы Йәлдәк ауылында йәшәгән Абдуррахман Дүсмәтов бала саҡтан мал йәнле булып үҫә. Бөгөн ул үҙ хужалығын булдырып, ат үрсетеү менән шөғөлләнә. Былтыр “Яңы эш башлаған фермер” булараҡ дәүләт программаһында ҡатнашып, грант ота. Грант аҡсаһына 40 баш тоҡомло ат һәм МТЗ тракторы һатып ала. Үҙ эшен башларға тәүәккәлләгәс, аттарҙы тоторға ферма төҙөй, 75 гектар майҙан ерҙе рәсмиләштерә. - Ат - иң аҡыллы хайуандарҙың береһе. Улар һиҙгер, кешенең нимә уйлағанын аңлай. Тупаҫлыҡ күрһәтһәң, шунда уҡ яуап бирәсәктәр. Хужаларын әллә ҡайҙан танып торалар, тауышты ишетеү менән бышҡыра-бышҡыра эргәңә ашығалар, - тип аттар тураһында һөйләй ул. Абдуррахман 2012 йылда Яр Саллы ҡалаһындағы “Аҡ мәсет” мәҙрәсәһендә уҡый, Ҡазан ислам университетында белем ала. Үҙ эшен 2020 йылда башлап ебәрә. Ҡатыны Әмирә менән Ҡазан ҡалаһында йәшәйҙәр, эшләйҙәр, әммә күңел тыныслығы таба алмаған егет, тыуған яғына ҡайтып ат үрсетеү менән шөғөлләнергә була. Егеттең киләсәккә пландары күп. Киләсәктә аттар һанын арттырып, район халҡын йылҡы ите менән тәьмин итергә ниәтләнә ул. Автор: Гөлназ Хужина.