Башҡортостан Республикаһы Башлығы студенттарҙы ҡотланы

Башҡортостан Башлығы Радий Хәбиров студенттарҙы байрам менән ҡотланы. "Ҡәҙерле дуҫтар! Рәсәй студенттары һәм Татьяна көнө уңайынан ихлас ҡотлауҙарымды ҡабул итегеҙ! Студент йылдары – яңы офоҡтарға ынтылыу һәм асыштар өсөн ғәжәйеп матур ваҡыт. Һеҙҙең идеяларығыҙ, энергияғыҙ, донъяны яҡшы яҡҡа үҙгәртергә ынтылышығыҙ артабан алға барыуға булышлыҡ итә. Бөгөн республиканың юғары уҡыу йорттарында Башҡортостандан, Рәсәйҙең башҡа төбәктәренән һәм сит илдәрҙән 100 меңдән ашыу студент уҡый. Һеҙ үҙегеҙҙе фәнни өлкәләрҙә һәм инновацион проекттарҙа әүҙем күрһәтәһегеҙ, академик программаларҙа, ирекмәндәр хәрәкәтендә ҡатнашаһығыҙ, стартаптарығыҙҙы, теләгән бер проекттарығыҙҙы уңышлы тормошҡа ашыраһығыҙ, гранттар отаһығыҙ, профессиональ һәм ижади конкурстарҙа, спорт ярыштарында еңәһегеҙ. “Фән һәм университеттар” милли проекты үҙ-үҙеңде үҫтереү һәм таланттарҙы асыу өсөн һеҙгә яңы мөмкинлектәр бирә. Тиҙҙән Евразия фәнни-белем биреү үҙәгенең вуз-ара студенттар кампусының беренсе этабы асыла. Өс юғары уҡыу йорто “Өҫтөнлөк-2030” программаһында ҡатнаша. Өфө фән һәм технологиялар университетында “Киләсәк моторҙары” алдынғы инженерлыҡ мәктәбе эшләй. Башҡа юғары уҡыу йорттары “Университет технологик эшҡыуарлығы платформаһы” федераль проектында һәм башҡа сараларҙа әүҙем ҡатнаша. Илебеҙ әлеге ваҡытта ҙур мәсьәләләрҙе хәл итеү өҫтөндә. Улар һеҙҙең һәм ҡасандыр үҙҙәре лә студент булған остаздарығыҙҙың иңенә төшә. Пландарығыҙ һәм хыялдарығыҙҙы тормошҡа ашырып, Башҡортостан һәм бөтә Рәсәй үҫешенә тос өлөш индерерһегеҙ, тип ышанам. Ҡәҙерле студенттар һәм сығарылыш студенттары, бөтә изге эштәрегеҙҙә һәм башланғыстарығыҙҙа уңыштар, үҙ көсөгөҙгә ышаныс, мөһим ҡаҙаныштар һәм еңеүҙәр теләйем! Башҡортостан Республикаһы Башлығы Радий Хәбиров". Фото: Мәскәүҙәге Башҡортостан студенттарының яҡташтар ойошмаһынан.